Gati dy vite më parë, Gjykata e Shkallës së Parë në Durrës liroi me kusht Lulëzim Berishën, i njohur ndryshe si ish-kreu i Bandës së Durrësit. Më herët Gjykata e Lartë pati rrëzuar kërkesën e prokurorisë, për ta dënuar me burgim të përjetshëm.
Edhe pse ishte dënuar me 25 vite burg, Berisha doli nga burgu pas më pak se 11 vitesh, qëkur u kap në prillin e vitit 2006 në Maqedoni, pas disa vitesh në kërkim për dhjetëra vrasje, plagosje, rrëmbime dhe grabitje.
Asokohe lirimi i tij shkaktoi një debat të madh politik, ku në qendër u vu kryebashkiaku i qytetit bregdetar Vangjush Dako. Ky i fundit doli garant, dhe e përfshiu në listën e ish të burgosurve, që do të kryenin “punë vullnetare” në shërbim të komunitetit.
Lulëzim Berisha u shndërrua sërish në protagonist kur policia bastisi shtëpinë e tij, në kuadër të një operacioni për shkatërrimin e organizate të narko-trafikut me qendër në Shijak.
Në media u raportua se ishte shpallur në kërkim nga policia, por vetë kjo e fundit e mohoi. Berisha u paraqit të nesërmen vetë në polici.
Një njeri me precedentë të tmerrshëm penalë është natyrshëm “i dyshuari i zakonshëm” në raste të tilla.
Bashkia e Durrësit, nuk ka bërë ndonjëherë me dije, cilat janë punët konkrete të Lulëzim Berishës në shërbim të komunitetit. Por nuk mund të mos bjerë në sy fakti që “dora e ngrohtë”
e shtetit, “përkëdhel” më shpesh gangsterët sesa ata që kanë rënë në burg për bukën e gojës.
