Update/Seanca e masave të sigurisë për 23 protestuesit e ndaluar po zhvillohet ditën e sotme në Gjykatën e Tiranës, për llogari të Gjykatës së Kukësit. Kjo për shkak të kapaciteteve të vogla të gjykatës në qytetin verilindor.
Seanca me dyer të mbyllura nisi rreth orës 09:30, pak minuta me vonesë nga orari që ishte parashikuar.
Mësohet se në sallën e gjyqit janë lejuar deputetët e opozitës, që më parë u penguan. Ky ishte një vendim i marrë nga gjyqtarët e çështjes.
Por, disa prej tyre kanë arritur të hynë me forcë në gjykatë të cilët janë: Edmond Spaho, Gent Strazimiri, Flamur Noka, Albana Vokshi, Jorida Tabaku, Dhurata Cupi, Aldo Bumci, Orjola Pampuri, Rudina Hajdari.
Sot vendimi për protestuesit, 1000 forca policie në gatishmëri. Tension me deputetët e PD-së, thyhet dera e gjykatës.
Deputetët e opozitës kanë mbërritur në Gjykatë, për të ndjekur nga afër dhënien e vendimit për 23 të arrestuarit.
Sipas informacioneve deputetët nuk janë lejuar që të futen në sallë dhe ka pasur përplasje me policinë.
Por nga ana tjetër dhe një grup protestuesish kanë nisur tubimin e tyre me thirrje: Lironi djemtë tanë. Turp!
Blindohet Gjykata e Tiranës, sot masa e sigurisë për të arrestuarit e “Rrugës së Kombit”
Paraditen e sotme në Gjykatën e Tiranës pritet të mbahet seanca për masën e sigurisë për 23 të arrestuarit në Kukës pas protestës së dhunshme në Rrugën e Kombit.
Për arsye sigurie, masa për 23 të ndaluarit e protestës nuk do të zhvillohet në qytetin e Kukësit, por në Tiranë. Ndërkohë, forca të shumta policie kanë rrethuar mjediset përreth gjykatës në kryeqytet.
Ky është vendimi i marrë nga autoritetet pas një vendimmarrjeje të mëparshme që kishte shpallur Gjykatën e Kukësit si vendin ku do të shqyrtohej seanca për të dyshuarit e protestës së 31 marsit. Vendimi i beftë i një dite më parë u mor pak orë pasi policia lokale po përgatitej dhe do të kërkonte forca shtesë për sigurimin e rendit në Kukës.
