Ajo që bëri kryeministri Rama me banorët e Kukësit në videokonferencën e tij të mbajtur të enjten lidhur me tarifën për Rrugën e Kombit ishte më shumë se e turpshme.
Kreu i Bashkisë së Kukësit, Bashkim Shehu, duke folur për ngjarjet e dhunshme të ndodhura në këtë qytet gjatë protestës kundër tarifës së Rrugës së Kombit, theksoi se të ftuarit e videokonferencës së Ramës ishin punonjës të prefekturës dhe jo banorë të Kukësit. Sipas tij, Rama nuk kishte pse ta bënte një gjë të tillë kur mund të komunikonte nga afër.
“Rama ka degraduar në komunikimin e tij në videokonferencë sepse ata që ishin aty nuk ishin qytetarë. Po ishin punonjës të prefekturës. Rama e mban komunikimin e tij si pikën më të fortë por në fakt ajo videokonferencë linte shumë për të dëshiruar. Dhe nuk kishte pse bënte një videokonferencë kur mund të shkonte vetë të takonte qytetarët”, theksoi Shehu.
I ftuar në emisionin “Kjo Javë” të Neës 24, kryetari i Bashkisë, tregoi se ka folur disa herë me kryeministrin për të gjetur një zgjidhje për qytetarët e Kukësit për të mos bërë të mundur pagesën e taksës nga ana e tyre.
Ai madje tha se nuk i shkoi në takim kreut të qeverisë pas ftesës së tij, pas arrestimit të 23 personave lidhur me këtë ngjarje.
Bashkim Shehu:
Kam bërë kërkesë që të gjendet zgjidhje që qytetarët e Kukësit të mos paguajnë këtë taksë. Kam takuar edhe kryeministrin Edi Rama në zyrë. I kam kërkuar dhe kam dhënë shpjegimet se pse Kukësi do kishte 0 pagesë. Kemi biseduar e kemi marrë mendimet e qytetarëve dhe kemi pritur transparencë, dëgjesë me publikun. Unë nuk protestova, ruajta linjën institucionale të reagimit.
Dy ditë pas protestës, kam bërë thirrje që jemi kundër dhunës ndaj çdo personi apo institucioni. Kam biseduar me kryeministrin që të gjenim një zgjidhje. Kam folur me policinë e qarkut për të qenë në gatishmëri.
Situata degradoi në Kryeministrit i thashë që nuk jam pjesë e kësaj proteste, i kërkova zgjidhje, folëm dhe për një takim ditën e hënë, dhe pranova, për të hënën që kaloi. Nuk e takova se edhe në reagimin që pata unë të nesërmen, qytetarët e Kukësit prisnin nga unë që të kishte drejtësi, dhe nuk kisha pse të shkoja në një takim kur u arrestuar qytetarë të pafajshëm. Ishte e pamundur të shkoja në takim kur qytetarët e mi u morën nga shtëpitë në mes të natës në kundërshtim me ligjin,” tha Shehu.
