Gjatë protestës së tyre para Ministrisë së Energjisë, naftëtarët e Ballshit dhe të Fierit janë përplasur me deputetin e PS-së në qarkun e Fierit, Ismet Beqiraj.
Ky i fundit ka shkuar të bindë protestuesit se po mundohet që të zgjidhë këtë çështje, por naftëtarët kanë shpërthyer ndaj tij, duke e quajtur “hajdut” dhe “sinonim të vjedhjes”.
Protestuesit: “O Ismet, na ke lënë pa bukë!”
Deputeti: Unë po luftoj ndryshe për juve.
Protestuesit: Je hajdut ti, je sinonim i vjedhjes
Deputeti: Mbaj gojën se je ti hajduti! Më merr të keqen ti, nuk jam hajdut fare, më njohin!
Madje, në një moment mes të pranishmeve ka pasur edhe përplasje fizike, teksa një burrë i pranishëm shtyn protestuesin që quajti “hajdut” deputetin.
Naftëtarët e Ballshit dhe Fierit po protestojnë përpara Ministrisë së Energjisë për shkak se kanë disa muaj pa marrë pagat.
Ndërkohë, brenda ministrisë ka nisur takimi midis ministrave Damian Gjiknuri dhe Arben Ahmetaj me gjashtë përfaqësues të naftëtarëve.
