“Stop” është ndalur këtë herë në fshatin Çezmë e Vogël në Mokër të Pogradecit. Emisioni dhe “Fundjavë Ndryshe”, janë ndalur në historinë e trishtë të varfërisë në familjen Cosolli. Anisa, Andi e Marisol janë 3 fëmijët e çiftit, që lufton për mbijetesë. Ata kanë 4 vjet pa ujë e drita, ndërsa muret e shtëpisë mund të bien nga çasti në çast, duke i zënë brenda.”Stop” dhe “Fundjavë Ndryshe” bëjnë apel për të ndihmuar këtë familje për t’i blerë një shtëpi të re më afër qytetit.
Kryefamiljarët flasin për betejë të ditëpërditshme me varfërinë, sëmundjen e burrit dhe virozat që kapin fëmijët. Më e madhja e fëmijëve, Anisa ka një dhomë që vetëm e tillë nuk mund të quhet. Ndërsa 4 pjesëtarët e tjerë të familjes flenë sëbashku. Dy prej tyre në shtretër të improvizuar.
Anisa thotë se marrin 50 mijë lekë në muaj nga shteti. Por nga ana tjetër kanë edhe shumë borxhe nga ushqimet e marra me listë në dyqane.
“Kam shumë ëndrra, por nuk e besoj se do të më realizohen”, thotë ajo. Ndërsa Marisol kujton se ka qenë një javë e sëmurë me grip, “por babi nuk kishte çfarë të bënte për mua se nuk kishte lekë.”
“Në të gjithë këtë moment ka një apel shumë të fortë për t’i ndryshuar jetën kësaj familjeje. Aq sa mundemi të gjithë, me një shtëpi të re diku më poshtë, më afër qytetit, ku fëmijët të kenë mundësi të frekuentojnë shkollën, të punësohen, të kenë urgjencën, spitalin më afër’, tha Saimir Kodra.
