Kapiteni i Kroacisë nënkampione bote dhe ylli i mesfushës së Realit të Madridit, kampion Europe, Luka Modriç është fituesi i Topit të Artë 2018. Mesfushori bëhet kroati i parë në histori që arrin të fitojë trofeun më prestigjioz individual dhe e bën këtë duke thyer një hegjemoni 10-vjeçare të dyshes Messi-Ronaldo.
Modric tashmë është një ndër mesfushorët më të mirë në historinë e futbollit, por pakkush e di sa e vështirë ka qenë fëmijëria e tij.
Mesfushori i Realit, shpirti i kombëtares kroate, një ‘anemik’ në pamje, por që të bën gjëmën në lojë. Kohë më parë, është shfaqur një video ku Luka 5-vjeçar është kapur duke ruajtur dhitë mbi Velebit, pranë Zadarit, prej nga është dhe vendlindja e tij.Por si është bërë ajo video? A mos prej atëherë syri që e ka kapur fëmijën-çoban e ka ditur në të ardhmen ai do jetë një ndër mbretërit e fushave që kushton miliona? Sigurisht që jo.
Materiali është kapur nga Paul Balenoviç 28 vjet më parë, ndërsa ka dashur të realizojë një dokumentar mbi ujqërit. Pra është krejt një koinçidencë. Luka 5 vjeç, shfaqet për disa sekonda pas minutës së dytë të regjistrimit.
Vete autori Balenoviç rrëfeu si shkoi deri te fokusimi i një çobani që më pas u bë i famshëm:
“Që nga fëmijëria unë magjepsesha nga natyra dhe kafshët. Ndër to dhe ujqërit. Ndaj dhe nisa të udhëtoj për t’i studiuar ato nëpërmjet filmimeve”,- tha ai
Dhe në rrugëtimin e tij nëpër fshatra, ai ka njohur dhe familjen Modriç.
“Ata ishin njerëz të mirë. I vizitoja sa herë që shkoja për të filmuar kafshë të egra, natyrën dhe jetën në male. Kështu që një ditë regjistrova dhe fëmijën e tyre, Lukën, që ruante një kope dhish. Menjëherë pas vitit 1990,lufta shkatërroi shtëpinë e tyre. Gjithçka ndryshoi papritur dhe nuk i pashë më. Ata u larguan si shumë njerëz nga ajo zonë. Dhe vetëm pak vite më parë jam njoftuar mbi atë djalë të vogël që ishte bërë futbollist i njohur, Luka Modric”, përfundon Paul Balenoviç, njeriu që nga pasioni për kafshët, i ofron sot botës të shkuarën e pazakontë të një ylli botëror. Përshtati në shqip Tirana Today
