Pak ditë më parë u trondit bota e futbollit nga rrëzimi helikopterit në Leicester, ku humbi jetën presidenti i klubit Vichai Srivaddhanaprabha. Në këtë aksident përveç kreut të klubit, humbën jetën edhe katër persona të tjerë.
Megjithatë, mediat britanike kanë publikuar edhe videon nga brenda stadiumit që tregon në detaje të plota rrëzimin e helikopterit. Biznesmenin tajlandez është një personazh i njohur për publikun, por kush ishin katër personat e tjerë që humbën jetën në atë aksident tragjik:
Eric Swaffer (53 vjeç): Pilot i helikopterit dhe sipas dëshmitarëve të ngjarjes një hero në këtë histori. Nëse nuk do ta kishte drejtuar helikopterin në ambientet e jashtë stadiumit, pasi ndodhi problemi teknik, numri i viktimave do të ishte shumë më i madh, pasi tifozë të shumtë ende po largoheshin nga impianti. Swafer ishte një pilot veteran, që më parë kishte shërbyer edhe në Familjen Mbretërore.
Izabela Roza Lechowicz (46 vjeçe): Pilotja e dytë dhe njëkohësisht partnerja e Swaffer. Kishin nisur të punonin bashkë duke udhëtuar në të gjithë botën dhe thoshin gjithmonë se ishin me pushime të përhershme. Origjina e saj ishte polake dhe ambasada e vendit të saj në një qëndrim zyrtar shkruante se ishte një pilote e mrekullueshme. Ka qenë finaliste e “Polka100”, dhe është përfshirë në listën e “grave të jashtëzakonshme që frymëzojnë komunitetin polak në Mbretërinë e Bashkuar”.
Nusara Suknamai (33 vjeçe): Mikeshë dhe anëtare e stafit të Srivaddhanaprabha. Në Miss Universe Thailand në vitin 2005 doli e dyta si dhe mori çmimin e Miss Fotozhenisë. Ndiqte gjithmonë ndeshjet e Leicesterit dhe ishte shumë aktive në rrjetet sociale, duke publikuar fotot me emra të rëndësishëm të skuadrës si Vardy, Schmeichel…
Kaveporn Punpare: Krahu i djathtë i Srivaddhanaprabha. Ka pak të dhëna për të. Dihet vetëm që ka punuar për presidentin, i cili e thërriste me nofkën “Golf”. Në profilin e tij në Facebook shkruante se jetonte në Bankok, kryeqytetin e Tajlandës.
