Një aksident tragjik që ka marrë jetën e një 50-vjeçari ka ndodhur mëngjesin e sotëm në Athinë, ku një makinë e drejtuar nga një shqiptar u përplas me stacionin e autobusit.
Mjeti goditi një qytetar 50-vjeçar që priste në stacion, duke i shkaktuar vdekjen e menjëhershme. Sipas mediave greke, aksidenti ndodhi në orën 08:20 në lagjen Metamorfozis të kryeqytetit grek.
Automjeti tip “Volkswagen” drejtohej nga një shqiptar, i cili mbeti i plagosur. Lëndime pësoi edhe vajza 9-vjeçare e shqiptarit, e cila ndodhej në makinë dhe nuk kishte vendosur rripin e sigurimit. Ata u dërguan në spital për të marrë ndihmë mjekësore. Dëshmitarët në vendngjarje thanë se u plagos lehtë edhe një i moshuar 78-vjeçar, i cili po priste në trotuar.
Hetuesit grekë pritet t’i bëjnë testin e alkoolit shoferit shqiptar, për të parë nëse ka qenë i dehur kur shkaktoi aksidentin. Rrethanat janë të paqarta dhe nuk dihet se si makina goditi stacionin e autobusit. Autoritetet e konsiderojnë këtë aksident si “të pashpjegueshëm”. Sipas tyre, vendi ku ndodhi përplasja është rrugë e drejtë dhe nuk ka kthesë.
Një dëshmitar përshkroi situatën pak çaste pas aksidentit.
“Pashë shoferin të përplasur në timon dhe pashë një vajzë të vogël në sediljen e pasme duke bërtitur ‘babi babi’. Kur e pyeta se çfarë ndodhi, më tha “babi po më çonte në shkollë”, u shpreh dëshmitari.
