Kryetarja e Kuvendit të Kosovës, Vjosa Osmani thotë se ka denoncuar në polici deputetin e LDK-së, Xhavit Ukaj.
Gjatë seancës së djeshme parlamentare, Ukaj është ngritur dhe i është vërsulur Osmanit, duke bërë që kjo e fundit të ndërpriste seancën.
“Ndaj deputetit që më ka kërcënuar fizikisht dhe me gjuhë banale të paprecedent për një institucion si Kuvendi, kam hapur rast në polici. Shpresoj që organet e rendit të merren sa më shpejt me këtë rast, ndërkaq ne i kthehemi punës së Kuvendit të hënën në orën 14:00, sipas vendimit të Kryesisë së Kuvendit. Ka tema të rëndësishme me të cilat duhet të merremi, siç është menaxhimi i pandemisë dhe nuk lejoj asnjë person të papërgjegjshëm të më pengojë në kryerjen e detyrës zyrtare në përputhje me rregulloren e Kuvendit”, shkruan Osmani në Facebook.
Nga ana tjetër, në një prononcim për Gazetën Express, Ukaj ka thënë incidenti erdhi për shkak se Osmani ia kishte dhënë fjalën disa herë deputetes Fitore Pacolli.
“Nuk ka qenë incident, diçka unë reagove pse po e lejon atë të LVV-së me ja dhënë fjalën edhe me ofendu zv kryeministrin, ajo më bëri me gisht me tha ulu, ajo është tash përkrah VV-së. Nuk e kam mërit me ma bo me gisht, nuk duhet me ja bo deputetit me gisht. Ajo dihet qëndrimi i asaj, çdo gjë kundër LDK-së”, tha ai.
