Portieri i Partizanit, Aldo Teqja dhe babai i tij, Ramazan Teqja kanë treguar si qëndron e vërteta dhe shkaqet e aksidentit ndodhur tre ditë më parë në Tiranë. 24-vjeçari, i cili ndodhet ende i shtruar në Spitalin e Traumës për shkak të dëmtimeve në mushkëri, ra nga kati i shtatë i një pallati në zonën e Komunës së Parisit.
Në një intervistë ekskluzive dhënë për “Top Channel”, babai i tij përgënjeshtroi pretendimet e mediave, të cilat bënin me dije që portieri, para se të hidhej nga kati i 7-të, u përfshi fillimisht në një debat me partneren gjatë kohës që po qëndronin në makinë.
Por, në fakt, sipas babit të tij, 24-vjeçarit iu kërkua nga nëna e tij të rregullojë tendën në ballkon, teksa në një moment ka humbur ekuilibrin dhe është rrëzuar.
“Dua të përgënjeshtroj të gjitha mediat dhe portalet, djali im ka pësuar një aksident. Gjithashtu dua të falenderoj të gjithë stafin e spitalit të traumës, Klubin Partizani dhe Federatën Shqiptare të Futbollit për ndihmën që na kanë dhënë. Gjithashtu dua të theksoj se e fejuara e djalit së bashku me prindërit e saj kanë qenë këtu me ne që nga dita e parë dhe deri më tani. Aldo do të kthehet shumë shpejt si kampion”, tha për ‘Top Channel’ Ramazan Teqja.
Gjendjen e tij të përmirësuar e ka pohuar edhe vetë Aldo, ndërsa ndodhej në pavion së bashku me të fejuarën.
“Ndihem mirë…më e keqja kaloi, do të rikthehem shpejt në fushën e lojës”, theksoi portieri.
