Ermal Mamaqi ka folur pa doreza, teksa ka rrëfyer një situatë nga fëmijëria e tij, kur kishte tentuar që të bënte tregti. Fitimi i lekëve falë disa librave të shitur tek shokët me dyfishin e çmimit, e kishin bërë atë të ‘pasur’ për pak çaste, deri sa në dijeni të ishin vënë prindërit e tij. Përballë Bora Zemanit, dhe makinës së të vërtetës, Ermal Mamaqi tregoi historinë më agëtuese, e cila datonte kur ai do të niste klasën e tetë.
“Atëherë nuk ishte shumë e lehtë të merrje libra shkollorë. Ishte e vështirë të siguroje librat në fillim të vitit shkollor, se ka pasur shumë pak. Ka qenë një librari përballë Parlamentit, në krahun tjetër të rrugës dhe shkoj blej librat e mi, blej dhe katër Dituri Natyre, katër Matematika, katër Lexime. I marr dhe ia shes shokëve të klasës me dyfishin e çmimit. E bëra tre herë këtë. Marr lekët, i çoj në shtëpi dhe u them të shtëpisë: ‘Shiko, fitova lekë, kam bërë tregti,’ tregon ai.
Pasi Ermali u kishte treguar prindërve se çfarë kishte bërë, ata nuk e kanë mirëpritur aspak mirë.
“Ata më panë, më thanë: ‘Çfarë ke bërë ti? Kjo është edukata që të kemi dhënë ne ty? Po ti matrapaz je?”. Më bënë për një lekë. Unë i shkreti isha djegur në radhë gjithë ditën, isha degjeneruar duke blerë libra. Më shkoi gjithë puna dëm”, tha ai.
Të nesërmen shkoi në shkollë, dhe u ktheu shokëve diferencën e lekëve, duke mos fituar asgjë.
