Vetëm pak javë nga kremtimi i 2-vjetorit, Alfie Evans mori frymë për herë të fundit, në të njëjtin spital britanik, ku kaloi pjesën më të madhe të jetës së tij të shkurtër.
Prindërit e tij, të dërrmuar nga dhimbja, dhanë njoftimin në rrjetet sociale: Vogëlushi ynë u ngjit sot në mbrëmje në qiell. Ne jemi zemërthyer…Në muajin e tij të parë të jetës Alfie ishte shumë mirë, por ai u shtrua në spital, pas disa krizave që shkaktoheshin nga një gjendje të rrallë e trurit, që sipas mjekëve ishte e pamundur të mjekohej.
Një gjykatë vendosi fikjen e aparaturave që e mbanin në jetë. Prindërit e tij, luftuan kundër këtij vendimi. “Askush, e përsëris askush në këtë vend, nuk mund të largojë djalin tim nga unë”, u shpreh i revoltuar i ati i 2-vjeçarit.
Beteja tragjike dhe e hidhur për ta mbajtur atë gjallë, preku gjithë botën. Edhe vetë Papa Françeku ndërhyri, duke takuar Tom Evansin në Romë.
Një spital në Vatikan, u ofrua të trajtojë fëmijën, por përpjekjet u refuzuan nga gjykata, që vendosi se vogëlushi nuk kishte asnjë shans që të merrte veten. Alfie u hoq nga aparaturat që e mbanin në jetë të hënën. Familja, bashkëpunoi me doktorët për ta bërë atë procedurë më të thjeshtë.
Mbështetës të vogëlushit, që qëndruan para spitalit për 4 ditë me radhë, janë tashmë në zi. Rasti është i ngjashëm me atë të vogëlushit Charlie Gard, i cili vdiq në Londër vitin e kaluar.
Një gjykatë rrëzoi peticionin e prindërve të tij për ta çuar në SHBA, për një trajtim eksperimental. Prindërit e Alfie luftuan për disa muaj me shpresën e shpëtimit të jetës së djalit të tyre. Tani teksa mban zi, turma e mbështetësve përkujton jetën e shkurtër të Alfie.
PËRSHTATI TIRANA TODAY
