Në komunikimin e sotëm, të rinjtë shqiptarë flasin me shkurtime ose me fjalë të huaja. Sepse të flasësh shqipen standarde nuk është “cool” sipas tyre. Por, rreth 40 të huaj kanë ardhur në Shqipëri, për të mësuar gjuhën shqipe. Edhe pse konsiderohet një prej gjuhëve më të vështira, ata janë të vendosur për të mësuar shqipen standarde.
Të ardhur nga shtete si Rusia, Bullgaria, Gjermania, Rumania, etj., të rinjtë studiojnë gjuhën shqipe në universitetet në vendet e tyre.
“Përveç gjuhës shqipe, ne mësojmë edhe historinë e Gadishullit Ballkanik, ekonominë, kulturën e Shqipërisë. Janë të pakët njerëzit në Evropë, të cilët kanë dëgjuar për vendin tuaj. Ndaj është shumë interesante të mësosh gjuhën shqipe. Sa i takon gjërave negative në Shqipëri, nuk dua t’i njoh, pasi preferoj të shoh vetëm gjërat e mira.”
“Përveç se në shkollë, e praktikojmë shqipen duke lexuar intervista të ndryshme, edhe ato të politikanëve si të kryeministrit. Po ashtu, kam lexuar një libër shumë interesant për baletin shqiptar. Më bëri përshtypje pasi kuptova që shumë specialistë rusë erdhën në vendin tuaj, për të zhvilluar baletin dhe artin. Si edhe kam lexuar disa vepra të Ismail Kadares.”
Sofia vjen nga Gjermania dhe thotë për Tirana Today se do të qëndrojë për një vit në Shqipëri, pasi do të japë mësim për gjuhën gjermane. Por, ishte dashuria për shqipen e cila e bëri të studiojë më tepër për këtë vend dhe të qëndrojë për një periudhë të gjatë këtu.
“Unë do të qëndroj një vit, pasi fitova një bursë dhe do të jap mësimin e gjuhës gjermane këtu në universitet. Në fillim isha pak e frikësuar, pasi jam në një vend të ri, larg shtëpisë. Por, duke qenë se është hera e katërt që vij në Shqipëri, kam krijuar disa miqësi. Dhe po ambientohem pak nga pak dhe me vendin tuaj. Shqiptarët nuk janë të organizuar dhe për mua është shumë e vështirë, pasi unë jetoj në Gjermani dhe gjermanët janë shumë striktë. Por, është interesante të bashkëjetosh me një kulturë tjetër, ndryshe nga e jotja.”
Ata thonë për Tirana Today se mësimi i gjuhës shqipe është shumë interesante për ta, pasi janë të pakët njerëzit të cilët e flasin. Madje shumë prej popujve të tjerë e paragjykojnë Shqipërinë.
“Më pëlqen shumë gjuha shqipe, tingëllon si muzikë. Në Bullgari janë të pakët njerëzit të cilët nuk e njohin gjuhën shqipe. Ndaj, nëse ti e di këtë gjuhë, je shumë më përpara se të tjerët. Por, ajo që më pëlqen më shumë janë urimet që ju bëni. Çdo njeri më uron të kem shëndet e të jem mirë. Mirëpo, për fat të keq ka shumë njerëz në Bullgari të cilët kanë paragjykime për shqiptarët. Por, nëse ata do të vinin këtu, jam e bindur që do të ndryshojnë mendim.”
“Gramatika e gjuhës shqipe nuk është shumë e vështirë, por shumë fjalë janë ndryshe nga gjithë gjuhët e tjera evropiane. Kam dëgjuar shumë gjëra të ndryshme për shqiptarët. Një prej tyre është se provojnë shumë që të marrin para. Unë e kam për herë të parë ardhjen këtu në Shqipëri, ndaj do të jetë shumë interesante të jetoj në një nga vendet i cili konsiderohet me ekonomi të dobët.” TIRANA TODAY
