Pedagogu Denis Himçi, i cili u filmua teksa i kërkonte favore seksuale një studenteje në këmbim të notës, mësohet se është shtruar në spital. Ai është dërguar në spital gjatë natës. Pedagogu është ndjerë keq në paraburgim, për shkak të problemave me tensionin, ndërsa kanë qenë efektivët që e kanë shoqëruar në spital.
Emisioni investigativ “Stop” publikoi rastin e pedagogut Himçi, i cili i kërkonte favore seksuale një studenteje në këmbim të marrjes së disa lëndëve ku ajo ishte mbetëse.
Në videon e publikuar nga “Stop”, pedagogu Denis Himçi shfaqet me një makinë luksoze tip Audi, ndërsa tregohet këmbëngulës duke i bërë komplimente, dhe duke i premtuar vajzës veç marrjes së provimeve, edhe dhurata gjithashtu. “Mallkuar ai që nuk të do ty, të çoj unë për ndonjë masazh. Zëre se unë jam engjëlli yt, dhe do t’i plotësoj të gjitha nga A-ja te Zh-ja”, dëgjohet të thotë pedagogu në video.
