Edhe pse shqiptarët janë të zhgënjyer nga politika, përsëri ajo është një pjesë e rëndësishme e jetës së tyre. Nuk ka rëndësi nëse janë me tavolinën plot apo bosh, nëse kanë apo jo një çati mbi kokë; të gjithë flasin për çështjet e politikës. Aq sa shpesh kthehen edhe në debate mes njëri-tjetrit. Tirana Today pyeti qytetarët se sa diskutojnë për tema që lidhen me politikën dhe nëse janë apo jo shqiptarët militantë.
“Nëna nuk ka bukë për të ngrënë, lëre më të di se çfarë janë militantët. Unë nuk kam as televizor për të ndjekur politikën, me aq pak ndihma që marr unë, mezi më mjafton për të ngrënë bukë. Vetëm se më kanë lënë në këtë gjendje, asnjë nuk dua. Ka qenë më mirë Enveri.”
“Ne kur dalim të pimë kafe nuk zihemi njëri me tjetrin për çështje politike. Ama shumë të tjerë si puna jonë, zihen vazhdimisht. Ne nuk e duam politikën, sepse ajo është gënjeshtare.”
“Ne vdesim për politikë, si nuk i duam ne?! Nuk i ke parë që dalin sa herë ka politikanë dhe duartrokasin kot e kot. Ne nuk jemi as dele, sepse ato e kanë një çoban që e ndjekin. Ndërsa ne nuk dimë nga të shkojmë.
Të debatosh apo edhe më keq të vrasësh tjetrin për politikë, është injorancë e shqiptarit. Duhet ta pranojmë, kështu jemi. Ne nuk na bëjnë më përshtypje vrasjet sepse nuk ka ditë që të mos ketë. Dhe për partinë po vriten të gjithë.”
Shqiptarët pa bukë, merren me politikë
“Shqiptarët nuk e duan fare politikën. Është e vërtetë që diskutojmë shumë për të, por gjithmonë qëndrojmë në sipërfaqe. Sepse ne asnjëherë nuk e dimë. Shqiptarët përfshihen shumë në muhabetet politike dhe pa qenë e arsyeshme.”
“Shqiptarët nuk kanë bukë të hanë, shkojnë e diskutojnë për politikë. Flasin kot, kur nuk kanë çfarë të bëjnë. Ky është mentaliteti që ekziston në Shqipëri. Duam apo nuk duam ne, jemi të lidhur shumë me politikën.”
“Unë për veten time e diskutoj shumë shpesh, madje edhe me gruan time. Por, kur vjen puna, në fund të ditës, dëgjoj shumë dhe flas pak.”
Një këshillë të cilën duhet ta konsiderojmë të gjithë. Veçanërisht kur bëhet fjalë për çështje politike. Dhe në këtë mënyrë në një të ardhme do të kthehemi nga turmë, në popull të ndërgjegjshëm. TIRANA TODAY
