Dy ditë më parë, drejt biznesmenit Spiro Iljadhi u shkrehën rreth 20 plu*ba, duke mbetur i plagosur rëndë. Sipas policisë, 35-vjeçari Spiro Iljadhi u përfshi në një konflikt me disa persona të tjerë. Si pasojë e përplasjes me armë zjarri, i plagosur mbeti edhe një kalimtar i rastit, një turist shqiptaro-amerikan, 33-vjeçari Mario Jani.
Uniformat blu arrestuan 33-vjeçarin, Redjan Jaderi pasi akuzohet se është një nga autorët që mori pjesë në plagosjen e biznesmenit. Sakaq, në kërkim janë edhe dy vëllezërit Andrea Caushi dhe Visi Caushi, të cilët gjithashtu akuzohen për plagosjen e 35-vjeçarit. Gjatë shoqërimit në komisariat, i riu ka pranuar krimin duke u shprehur se ngjarja ka ndodhur si pasojë e një sherri të çastit, shumë pranë lokalit në pronësi të biznesmenit.
Andrea Caushi, Visi Caushi dhe Redjan Jaderi janë tre të rinjtë nga Tepelena që ishin pjesë e sherrit që la pas dy të plagosur në “Orange Club” në Sarandë.
Gjithçka ka nisur kur tre autorët janë nxjerrë jashtë lokalit “Orange”, nga roja i sigurisë së lokalit. Kjo ka sjellë acarim nga ana e të rinjve, duke agravuar kështu në përdorimin e armëve të zjarrit.
Dalin pamjet nga përplasja me armë zjarri tek “Orange Club”
Videoja e cila është bërë virale, tregon përplasjen me armë zjarri që u regjistrua dy netë më parë në Sarandë, në “Orange Club”, si pasojë e të cilës mbeti i plagosur biznesmeni Spiro Iljadhi dhe një kalimtar, Mario Jani. Pamjet në fjalë tregojnë lëvizjen e klientëve që kanë qenë brenda në klubin e natës, kur ka nisur sherri mes dy palëve. Kujtojmë këtu se zanafilla e sherrit ka qenë urdhri i Iljadhit për të nxjerrë tre të rinjtë nga klubi i tij.
U kundërpërgjigj me armë, biznesmeni në pranga
Pas hetimeve të kryera, policia nëpërmjet pamjeve filmike vërtetoi se edhe biznesmeni i plagosur është kundërpërgjigjur me armë zjarri drejt tre autorëve. Për këtë arsye është shoqëruar në komisariat, ku pritet të përballet me akuzën për veprën penale “Vrasja në rrethana të tjera cilësuese”, kundër dy ose më shumë personave, mbetur në tentativë dhe “Armëmbajtja pa leje”.
“Ndalohet pronari i lokalit, i cili mbeti i plagosur me armë zjarri gjatë një konflikti me disa persona të tjerë. Në vijim të veprimeve për zbardhjen e ngjarjes së ndodhur mëngjesin e ditës së djeshme, në lagjen Nr. 1, Sarandë, ku mbetën të plagosur me armë zjarri shtetasit S. I. dhe M. J., nga specialistët për Hetimin e Krimit në Komisariatin e Policisë Sarandë u bë ndalimi i shtetasit S. I., 35 vjeç, banues në Sarandë. Ndalimi i këtij shtetasi u bë pasi nga veprimet hetimore, ka rezultuar se ka qëlluar me armë zjarri pistoletë ndaj personave të tjerë të përfshirë në konflikt, njeri prej tyre i ndaluar dhe 2 të tjerë të shpallur në kërkim nga policia”.
Tentoi të digjte me benzinë lokalin e biznesmenit, arrestohet “Ujku” në Sarandë
Bar “Orange” në Sarandë është sulmuar sërish paraditen e djeshme. Një 32-vjeçar ka tentuar t’i vërë zjarrin me benzinë subjektit në pronësi të biznesmenit. Bëhet fjalë për shtetasin Luan Obzova, i njohur ndryshe me nofkën “Ujku”.
Dyshohet se 32-vjeçari ka tentuar t’i vërë flakën lokalit, për të fshehur provat. “Tentoi të digjte me lëndë djegëse një biznes, arrestohet në flagrancë 32-vjeçari, person me precedent kriminal në fushën e narkotikëve. Në vijim të veprimeve, nga specialistët për Hetimin e Krimit në Komisariatin e Policisë Sarandë, u bë arrestimi në flagrancë, për veprën penale “Shkatërrimi i pronës me zjarr” mbetur në tentativë, i shtetasit L. O., 32 vjeç, banues në Sarandë, i dënuar më parë për veprën penale “Prodhimi dhe shitja e narkotikëve””, thuhet në njoftimin për shtyp nga policia. /TIRANA TODAY
