Një punëtor që po merrej me çmontimin e çatisë së një stadiumi në Rusi ka humbur jetën, pasi impianti u rrëzua i gjithi.
Ngjarja është shënuar më 31 janar në Shën Petersburg. Videoja tregon punëtorin teksa po pret me gurë fresibël shtresat metalike të çatisë së stadiumit, kur struktura masive shpërbëhet duke e zënë atë nën rrënoja.
Ai përpiqet të largohet drejt kafazit të lidhur me vinçin ku ndodhet një punëtor tjetër, por nuk mundet ta arrijë në kohë. Trupi i 29-vjeçarit u gjet më vonë nën rrënoja. Ai ishte një nga katër punonjësit që prenë kabllot metalike për të çmontuar çatinë e kompleksit sportiv.
Kreu i ministrisë së emergjencave në Shën Petersburg, Aleksey Anikin tha që tre punëtorët e tjerë ishin mirë dhe po merreshin në pyetje nga hetuesit. Stadiumi SKK Peterburgskiy, i cili u hap në vitin 1980, ka organizuar koncerte dhe ngjarje të ndryshme sportive.
Ai ishte duke u rikonstruktuar për të pritur Kampionatin Botëror të Hokejit në Akull në 2023.
