Pamjet që shihni në videon e Tv A2 nuk lenë vend për shumë koment. Janë të rënda dhe natyrisht të dënueshme. Një prej truprojave të kryeprokurores Arta Marku, shtyn dhunshëm gazetarin e Klan Plus, Renaldo Salianji. Ai thjesht po i drejton mikrofonin kryeprokurores dhe po tenton ta pyesë. Pra, ai thjesht është duke bërë punën e tij, ndërsa truproja i Markut sillet si gangster rrugësh edhe pse paguhet me para të taksapaguesve shqiptarë.
Ndërsa edhe vetë kryeprokurorja kur u pyet nga gazetarët e pranishëm nëse ka nisur një hetim për grabitjen e 9 prillit në Rinas, ajo është nervozuar dhe ka shtyrë mikrofonat e gazetarëve, ndërkohë ka thënë: Shkoni interesohuni në zyrat përkatëse të prokurorive, ju duhet ta dini shumë mirë që Prokuroria e Përgjithshme nuk bën hetime.
