Gjatë fjalës së tij nga turi i llogaridhënies në Korçë, kryeministri Rama i ka shprehur ngushëllimet familjarëve të Shkëlzen Qordjas, ish-punonjësit të Gardës që punonte si shofer i ministrit të Brendshëm, Fatmir Xhafaj, i cili u gjet i vdekur një ditë më parë.
Mjaft i prekur, ai i është përgjigjur akuzave të opozitës, ku hodhi skenarin se 31-vjeçari është vrarë dhe jo vetëvrarë. Sipas Ramës, këto akuza, në një tragjedi të tillë, tregojnë nivelin e ulët të sulmeve politike.
“Dua ta nis në mënyrë pak të veçantë këtë takim sepse rrethanat e diktojnë duke përfituar nga rasti për t’i shprehur ngushëllimet familjes së punonjësit të Gardës, i cili u nda nga jeta, pasi mori një vendim ekstrem dhe befasues për të gjithë ne, dhe dua të ndaj me familjen të gjithë ndjenjën më të fortë të keqardhjes për faktin se edhe përtej tragjedisë, edhe përtej dhimbjes së pangushëllueshme të një familje për djalin, vëllain, një njeri të shtrenjtë, ata nuk mundën të gjejnë së paku qetësinë për të lotuar brenda mureve të shtëpisë së tyre, sepse u gjendën në rrebeshin e zi të sulmeve politike për të njëjtat arsye, të mos arsyes që e kanë dominuar për kaq shumë kohë politikën tonë dhe që vazhdojnë ta dominojnë padashur fare të dinë për respekt, për të vërtetën jo e jo, por për njerëzit e thjeshtë në kulmin e një momenti dhimbje.
Agresioni brutal ndaj djalit që u nda nga jeta, përfshirja e tij në një skenar fantazie makabër, për të goditur ministrin e Brendshëm, për të goditur qeverinë, vërtetë që nuk ka fjalë për t’u komentuar. Është i neveritshëm, është i turpshëm”, tha Rama.
Shkëlzen Qordja, i cili ishte shofer i ministrit të Brendshëm u gjet i vdekur brenda ambienteve të Gardës së Republikës, mëngjesin e 30 Qershorit. Nga hetimet e deritanishme, rezulton se 31-vjeçari është vetëvrarë.
