Së fundmi është bërë virale një video, ku shfaqet kryeministri i Kanadasë Justin Trudeau, i cili qëndron më shumë se 20 sekonda pa iu përgjigjur një pyetjeje të bërë nga një gazetar.
Heshtja e tij erdhi pasi iu kërkua të komentonte atë çka po ndodh në Shtetet e Bashkuara të Amerikës.
“Të gjithë shohim të tmerruar atë që po ndodh në SHBA. Është koha të bashkojmë njerëzit, por edhe të dëgjojmë. Është koha të mësojmë çfarë është padrejtësia që vazhdon pavarësisht përparimeve përgjatë viteve apo dekadave. Por është edhe koha që ne, si kanadezë, të pranojmë që edhe ne kemi sfidat tona”, u shpreh më pas kryeministri kanadez.
Kujtojmë se vdekja e afrikano-amerikanit George Floyd ka shkaktuar një revoltë të madhe popullore dhe protesta të shumta në disa qytete amerikane.
Floyd, 46 vjeç, vdiq javën e kaluar, pasi u ndalua nga oficerët policorë, njëri prej të cilëve i bëri presion me gju në qafë dhe afrikano-amerikani pak orë më pas, ndërroi jetë.
