Një ngjarje e rëndë është regjistruar në Meksikë, teksa protestuesit i kanë vënë zjarrin një efektivi të policisë.
Protestat në qytetin e Guadalajara erdhën si pasojë e vdekjes së një të riu, menjëherë pas ndalimit nga policia.
Në videon e publikuar në rrjetet sociale duken një grup oficerësh të policisë me motoçikleta pranë protestuesve. Në një moment një prej protestuesve ka hedhur një lëndë djegëse në anën e pasme të njërit prej oficerëve dhe i vë flakën.
Polici vrapon dhe bie në trotuar ndërsa bashkëpunëtorët e tij dhe policët nxitojnë të ndihmojnë. Ata arrijnë ta shuajnë shpejt zjarrin, pas së cilës oficeri ngrihet dhe largohet nga vendi i ngjarjes.
Protestat në Meksikë u nxitën nga vdekja e Giovanni Lopez, 30 vjeç, i cili u arrestua një muaj më parë në afërsi të Guadalajara.
Disa orë pas arrestimit, burri u dërgua nga qelia e tij në një spital, ku edhe humbi jetën. Ishte vëllai i viktimës që publikoi pamjet, ku tregonte policinë duke përdorur forcë ndërsa arrestonte Lopez.
Dyshohet se Lopez u arrestua nga policia pasi u kap pa maskë në publik, por autoritetet mohuan që ky ishte rasti.
