Një video e publikuar nga gazetari Jorge Ramos dëshmon gjendjen e mjerueshme të qytetarëve venezulianë, si dhe harbutërinë e Maduros.
Ramos u nis së bashku me një grup gazetarësh në Venezuelë, ku kërkoi një takim me Maduron, që çuditërisht u pranua.
Gjatë vizitës atje, gazetari është shokuar nga ato që ka parë, duke sjellë dëshmi me pamje për të gjithën botën. Ai shikon disa të rinj që marrin mbeturina nga një automjet, e fillojnë t’i hanë ato.
“Shiko si jemi katandisur, po hamë mbeturina. Dua t’i them Maduros se ke dështuar. Ti nuk je për këtë punë, largohu nga shteti ynë. Nuk të duam më këtu”, thotë një qytetar i tërbuar.
Po ashtu, gazetari merr dëshminë e një gruaje e cila dëshmon se i afërmi i saj ndërroi jetë, pasi ajo nuk kishte mundësi që të paguante mjekimet, të cilat shkonin në rreth 30 dollarë.
Paga mesatare e një qytetari që punon në Venezuelë është vetëm 5 dollarë.
Teksa gazetarët janë pritur nën masa të rrepta, ata kanë parë përballë Maduron. Ky i fundit ishte në humor të mirë, kur Ramos i është drejtuar me pyetjen:
“Kush je ti? A je një president, apo diktator?”, kjo pyetje ka tërbuar Maduron, i cili ka vijuar bisedën me gazetarët. Më pas, Ramos i thotë se revolucioni kishte vdekur dhe se ai kishte dështuar. Kjo ka sjellë që Maduro të kërkojë përzënien e stafit, i cili u dërgua në një dhomë.
Ata kanë refuzuar të japin celularët apo mjetet e tjera që kishin me vete, por më pas, stafi i Maduros ka arritur t’i marrë ato me forcë, pasi ka zhdukur çdo dritë në dhomën ku ata qëndronin.
Pasi janë mbajtur aty prej më shumë se 3 orësh, stafi është përzënë nga shteti me forca sigurie, të cilëve u janë kthyer mjetet, por me të gjitha materialet e fshira.
