Kryeministri Edi Rama është pritur me protesta në Fier pas asaj të Lushnjes, teksa dhjetëra të rinj të FRPD e kanë pritur me pankarta në duart.
“Poshtë pashallarët e krimit”, “Rama, Tahiri, Xhafaj = Shqiperia jashtë Europës”, shkruhej në këto pankarta.
Ndërkohë forca të shumta policie kanë qenë të pranishëm, ku herë pas herë ka pasur edhe përplasje me protestuesit, siç shihet edhe në videon e mëposhtme.
Ndërkohë PD ka publikuar edhe një herë videon ku tregon se Drejtori i Policisë së Fierit, Albert Nushi, që ka grisur banderolën e të rinjve protestues.
“E paprecedente! Drejtori i Policise Fier gris banderolen e PD kunder bashkeqeverisjes me krimin!” shkruan PD.
Ndërsa Basha në “Facebook” lidhur me incidentin shkruan:
Shihni si ka përfunduar policia e shtetit: një polici private në shërbim të dyshes Rama-Xhafaj. Drejtori i policisë i pari dhe policët e tjerë pas tij rrëmbejnë dhe grisin banderolën e qytetarëve që protestojnë paqësisht dhe me dinjitet kundër krimit dhe drogës. Policë që kacafyten me qytetarët për të mbrojtur shefin! Turp dhe mjerim!
Këta policë as nuk e kanë idenë se veprimet e tyre janë dhunim i çdo të drejte njerëzore dhe politike, të drejtës së shprehjes, të drejtës së protestës, të drejtës për t’u dëgjuar, – sepse ata njohin vetëm shefin dhe jo Kushtetutën dhe ligjin. Janë Jaerd Çelët dhe Ermalët e policisë që edhe trafik droge bëjnë për shefin e vëllezërit dhe kushërinjtë e shefit.
Shikoni hendekun e madh që ekziston sot në Shqipëri mes qytetarëve europianë dhe shtetit antieuropian. Këta policë duhet të luftojnë drogën dhe krimin që Shqipëria të hyjë në BE, por si banditë ata luftojnë qytetarët që ngrenë zërin kundër drogës dhe krimit.
Shikoni gjithashtu nervozizimin e policëve si shenjë e një sistemi që po rrëzohet, siç rrëzohen regjimet antipopullore dhe antidemokratike. Qytetarët europianë po triumfojnë përditë mbi qeveritarët antieuropianë!
