Një jetë në skenë, një jetë në shtëpinë e çdo shqiptari. Një artist i cili ka bërë çdokënd të përlotet me mjeshtërinë aktoriale. Është “Nderi i Kombit”, Reshat Arbana, i cili në datën 15 shtator festoi ditëlindjen e tij të 78-të.
Për nder të një prej figurave më të mëdha të skenës dhe kinematografisë shqiptare, Bashkia e Tiranës organizoi një darkë mbrëmjen e shkuar. Mes urimeve të të afërmve, miqve, kolegëve për një jetë të gjatë dhe me role të tjera në teatër dhe kinematografi, aktori u shpreh: “Kam emocione shumë, më besoni që kam shumë emocione.”
Bacë Reshat, ashtu siç të gjithë e thërrasin, falënderoi të ftuarit dhe ndau një sekret me gjithë pjesëmarrësit.
“Asnjëherë nuk i kam festuar përvjetorët sepse nuk i dua. Më krijojnë emocione shumë të mëdha, por sonte po më duket krejt ndryshe. Për burrin qenka trimëri e madhe të bëhet 78 vjet, e të eci nga 80-ta, por na qenka edhe një mjerim i madh, kur mendon se ku do iki pas këtyre viteve që po kalojmë. Po ishallah në atë dynja, do shkojmë te ai vendi i mirë, jo te ai i keqi atje”, tha me humor aktori i madh.
Emra të shquar të artit shqiptar ishin të ftuar në mbrëmje, të cilët urimet për ditëlindjen e aktorit Arbana, i shoqëruan po ashtu me humor.
“Të siguroj unë Reshat, përderisa nuk është kthyer njeri do të jetë mirë. Brezi ynë është moshë e re, me lëkurë të vjetër”, tha aktori Luftar Paja.
“Reshat je kryevepër. Ti je “Nder i Kombit”, mund të bëhesh ‘Nder i Tiranës’, i Dardanisë, sepse gjithandej ke lënë një respekt shumë të madh,” u shpreh poeti Agim Doçi.
Sociologu i njohur Përparim Kabo kujtoi disa prej roleve më shënjuese në karrierën e të madhit Reshat Arbana, ku veçoi ndër të tjera, atë të Isa Boletinit, në filmin “Nëntori i dytë”.
“Të gjitha rolet e luajtura nga Reshati janë fenomenale. Edhe kur e sheh sot Isë Boletinin që luhet nga ty, mendon se ajo figurë historike je ti, siç mendon për Ismail Qemalin të interpretuar nga Sandër Prosi. Nuk mund të imagjinosh dot të tjerë në ato role.”
“Të uroj qindra vite, aq sa ta ka lënë ai që është në qiell. Por, ishallah të shkosh me këmbë e me mend siç je tani. Edhe u shtoftë sa më shumë barku i Reshat Arbanës”, uroi ish-prokurori Shkëlqim Hajdari.
Në festën e cila zgjati deri pasmesnate, të ftuarit edhe kërcyen e kënduan këngë popullore. Mes tyre edhe ministrja e kulturës Mirela Kumbaro e kryetari i Bashkisë Erion Veliaj. I cili në një intervistë për Tirana Today tha se në vitin e ardhshëm, aktori Arbana do të përfitojë një pension të veçantë.
“Na ka mbledhur një gëzim shumë i madh, ditëlindja e Bacës Reshat. Do doja që sot të ishte një moment që të kujtojmë jetën e një miku shumë të dashur, një njeriu që na ka frymëzuar, që ka ngelur i ri. Ka qenë frymëzues përtej çdo sistemi e çdo konjukture politike.
Ministria e Kulturës ka bërë një propozim për pension të veçantë edhe për Bacë Reshatin. Ndaj besoj që edhe në vendimmarrjet e fund-vitit të qeverisë, ai do të jetë pjesë.” TIRANA TODAY
