Një rast dhune i paprecedentë është regjistruar në një shkollë, në afërsi të kryeqytetit të Afrikës së Jugut, Johanesburg.
Një video e filmuar nga disa nxënës po qarkullon kohët e fundit në rrjetet sociale, ku duket drejtori i shkollës, i cili detyron nxënësit të vijnë në radhë përpara tij dhe më pas i rreh.
Sipas mediave të huaja, ngjarja e rëndë është regjistruar në shkollën “Bopedi Bapedi” në Limpopo. Videoja ka marrë reagime të shumta online, teksa departamenti i Edukimit të Limpopo deklaroi se ndaj drejtorit kanë nisur hetimet dhe pritet që shumë shpejt të merren masa disiplinore.
“Drejtorit të shkollës i është dërguar një letër pezullimi paraprak nga detyra dhe është ngarkuar me sjellje të pahijshme për administrimin e ndëshkimit fizik me nxënësit. Pezullimi paraprak është që të mos afrohet me nxënësit pasi do të frikësohen nga prania e tij në ambientet e shkollës”, thuhet në njoftimin e Departamentit të Edukimit në qytetin afrikano-jugor.
