Media prestigjoze britanike, Daily Mail ka publikuar pamjet nga momenti kur helikopteri ku udhëtonte Presidenti i Kolumbisë Iván Duque, u sulmua me breshëri armësh.
Nga pamjet, shikohet momenti kur helikopteri fluturon mbi një qytet në provincën e Norte de Santander afër kufirit me Venezuelën të premten e 25 qershorit, ku dhjetëra të shtëna u qëlluan në drejtim të tij, përpara se të ulej në mënyrë të sigurt në Aeroportin Camilo Daza në Cúcuta.
Presidenti Duque ndodhej në helikopter së bashku me Ministrin e Brendshëm Daniel Palacios, Ministrin e Mbrojtjes Diego Molano, guvernatorin e Norte de Santander, Silvano Serrano dhe disa zyrtarë të tjerë vendas. Për fat të mirë, askush nga udhëtarët në helikopter ose ekuipazhi i fluturimit nuk u plagos.
“Unë dua të informoj vendin se pas përmbushjes së një angazhimi në Catatumbo pranë qytetit të Cucuta, helikopteri presidencial ishte viktimë e një sulmi,” tha Duque në një deklaratë.
Presidenti Duque e konsideroi sulmin një akt frikacakësh dhe shtoi se nuk do të trembet asnjëherë nga këto ngjarje terroriste. Forcat e sigurisë në Kolumbi kanë dhënë urdhër dhe janë në kërkim për personat që janë përgjegjës për kryerjen e kësaj vepre.
