Janë bërë publike pamjet e aksidentit të ndodhur ditën e djeshme në kryeqytet, ku humbi jetën 45-vjeçari Fatmir Avdillari, i njohur edhe si ”Xubi” i Yzberishtit.
Në video shihet se ai vjen me një shpejtësi të madhe me motorin e tij, dhe përplaset me një automjet që po merrte kthesën për të lëvizur në anën tjetër të rrugës.
Për shkak të shpejtësisë së lartë, motori fluturoi disa metra në ajër me trupin e 45-vjeçarit, gjë që i shkaktoi dhe vdekjen.
Kush është Fatmir Avdillari, i njohur ndryshe si ”Xubi” i Yzberishtit?
Fatmir Avdillari, është i njohur si një ndër anëtarët e bandës së Yzberishtit në vitet ’97-’98, ku bashkëanëtarë kanë qenë edhe dy vëllezërit e tij, Nazmiu dhe Iliri, ky i fundit i cili identifikohet si “kapoja”.
Ilir Avdillari gjendet në burg, pasi bashkë me vëllezërit e tij, Fatmir dhe Nazmi Avdillari janë akuzuar se kanë vrarë më 27 janar ’98 biznesmenin italian Stefano Rossi, pronari i fabrikës “Niki Shoes”.Ngjarja ka ndodhur 100 metra larg fabrikës, kur biznesmeni italian sapo kishte tërhequr 30 milionë lireta nga Banka Italo-Shqiptare.
Xubi ka qenë dënuar me 12 vjet burg, ndërsa doli nga qelia në 2008. Një vit pasi doli ai ekzekutoi Ardian Tahirin në 11 prill 2009. Tahiri u vra me një plumb në kokë në rrugën “Irfan Tomini” në Tiranë. Në atë kohë, ‘Xubi’ pranoi në gjykatë krimin dhe deklaroi se Tahirin e kishte ndjekur prej një jave.
