Kryetari i Partisë Demokratike, Lulzim Basha duke folur në fjalën e hapjes së protestës së opozitës ndaj kryeministrit Rama dhe ministrit të Brendshëm Xhafaj i është drejtuar turmës me një poezi të Naimit, duke kërkuar dritë për të cilën kaq shumë ka nevojë Shqipëria.
Sipas tij, në shesh opozita ndodhet për të çliruar vendin nga krimi dhe nga e keqja. Për këtë arsye ai kërkon largimin e kryeministrit Rama një herë e mirë.
Lulzim Basha: Jemi mbledhur në shesh për të vërtetën dhe për dritën e së vërtetës. Sytë tanë kërkojnë dritë, dritën që vjen nga Perëndimi. Jemi mbledhur me qindra-mijëra në këtë shesh për të treguar se jemi evropianë. Dhe si evropianë ne besojmë tek demokracia dhe tek shteti i së drejtës. Kjo qeveri bizantine nuk përfaqëson aspak Shqipërinë dhe popullin e saj. Sot jemi këtu kundër qeverisë më antishqiptare. Sot është beteja midis të mirë dhe të keqes. Midis atyre që duan drejtësi dhe atyre që kanë kapur drejtësinë. Sot Shqipërisë i mungon shteti i së drejtës dhe shteti është kapur nga krimi dhe korrupsioni. Ne dëshmojmë ne nuk e pranojmë korrupsionin dhe nuk mbyllim sytë para krimit dhe drogës. Përparimin dhe stabilitetin mund ta sjellin vetëm njerëzit e lirë dhe jo autokratët e korruptuar. Të vetmet punë që hapi kjo qeveri është vetëm puna në fushat e drogës. Mirëqenia që krijoi kjo qeveri është vetëm luksi i qeveritarëve. Sot shqiptarët po dynden në Perëndim sepse nuk besojnë më se do të ketë liri dhe demokraci perëndimore. Rilindja është sinonim i urrejtjes ndaj vendit të saj. Sot ka vetëm një rrugë, largimi i kësaj qeverie nga populli i bashkuar. Në këto 30 vite udhëtimi ynë politik ka qenë ulje-ngritje. Është përsëritur vazhdimisht e keqja. Ne sot nuk kërkojmë vetëm ndryshimin e qeverisë por ndarjen e politikës nga krimi, korrupsioni dhe e keqja dhe duam një qeveri që punon për të ardhmen e njerëzve. Pushtetin e bën të mirë frika nga populli.
