Në SHBA shprehja “to big for fail” (tepër i madh për të falimentuar), përdoret për kompanitë e rëndësishme që zënë një peshë speficike në ekonominë e vendit. Në Shqipëri, ka mesa duket “persona tepër të rëndësishëm për t’u arrestuar”.
Kjo vlen para së gjithash për Klement Balilin, i konsideruar nga mediat ndërkombëtare si ”Eskobari” i Ballkanit, një ndër trafikantët kryesorë të kokainës në Europë. Policia shqiptare po përpiqet prej 2 vitesh ta vërë në pranga, dhe nuk ia ka dalë dot deri tani. Në shumë raste është folur për dekonspirim të operacioneve nga punonjës policie. Një variant i besueshme, pasi kjo ka ndodhur qindra herë
. Por “ndihmën” më të madhe Balili e ka pasur nga politika e të gjitha krahëve. Tej veprimtarisë së tij të dyshuar si kriminale, bizneset e familjes së tij kanë lulëzuar në kohën e demokratëve dhe socialistëve. Balilët kanë mbështetur apo përfaqësuar politikisht në varësi të momentit dhe interesit, PD, PS apo LSI. “Santa Quaranta”, resorti luksoz i tyre në Sarandë u përurua nga krerët më të lartë të shtetit.
Për t’u sekuestruar 2 vite më pas, vetëm pas bujës që shkaktuan mediat e huaja me dosjen e tij penale. Ambasada amerikane e ka fshikulluar publikisht qeverinë dhe agjencitë ligj-zbatuese, për dështimin e tyre të turpshëm për të ndaluar Balilin.
Deri më sot, pikërisht për shkak të lidhjeve të errëta me politikën, Balili rezulton “tepër i rëndësishëm për t’u arrestuar”. Nesër, kapja apo “vetë-dorëzimi” i tij, nuk do të zvogëlojë, përkundrazi do të shtojë dyshimet, se çfarë çmimi është paguar në kurriz të drejtësisë, për këtë “sukses” të vonuar./TIRANA TODAY/
