Nëse kthejmë kokën pas, secili prej nesh do të kujtojë copëza shfaqjesh nga prestigjatori Nadir Mura. Një prej tyre ku bëri shumë zhurmë e jehonë të madhe ishte rasti ku ai pretendoi se u hodh nga 15-katëshi.
Ndonëse në vendin tonë njihet si iluzionist, Nadir Mura tashmë po provon veten në një tjetër fushë, produksionin. Në një intervistë me moderatorin e emisionit “KafeIN”, Nadiri tha se është producent i projektit me cikël dokumentarësh që po xhiron në Itali, ku jeton aktualisht me familjen e tij.
“Dokumentarët që po xhiroj janë projekt me fondet publike të krahinës së Lacios dhe Pulias. Dokumentarët i kushtohen emigrantëve të suksesshëm shqiptarë në Itali. Psh kam xhiruar Gëzim Myshqetën dhe Ilir Shaqiri, Etrit Berisha, pra figura të çdo lloj fushe”, tha Nadiri.
I pyetur nga moderatori Qarri, Nadiri tha se ka menduar t’i sjellë këto dokumentarë të transmetohen dhe në mediat televizive në Shqipëri, në gjuhën shqipe.
