Si në diktaturë, ashtu edhe në demokraci, politika nuk ka reshturi së futuri hundët në sportin më popullor në vend, futbollin. Në komunizëm ishin Vllaznia dhe 17 Nëntori (Tirana), ato që pësonin shpesh padrejtësi, në favor të klubit Dinamos (Ministria e Brendshme) dhe Partizanit (Ministria e Mbrojtjes).Sot viktimat janë kryesisht klubet ende të pronësi të bashkive, që bëhen kurban në varësi të përkatësisë politike të drejtuesve vendorë.
Të gjithë e dinë se Skënderbeu i 8 viteve më parë ishte një projekt sportiv por aq sa edhe politik, ku falë ndërhyrjes skandaloze të pushtetarëve demokratë u manipuluan 2 kampionate.
Me këtë ndërhyrje, PD shpresonte të fitonte bashkinë e Korçës në majin e vitit 2011, edhe pse shumica e korçarëve, dëshmuan se bindjet politike janë shumë të të forta sesa tifozllëku sportiv.
Me rritjen e cilësisë në fushë, Skënderbeu nisi të fitonte me meritë, por dëmi ishte bërë, dhe për këtë arsye është penalizuar rëndë nga UEFA.
Mbyllja e djeshme e kampionatit ishte e turpshme. Urdhrat politikë për të shpëtuar Vllazninë, ekipin e bashkisë më të madhe që kontrollohet nga e djathta, nxitën urdhra të tjerë nga e majta për të lejuar fitoren e Kamzës në ndeshjen me Partizanin, për ta degdisur Vllazninë pas shumë vitesh në Kategorinë e Parë.
Një dramë e madhe për një ekip me traditë, të cilën e përjetoi vjet një skuadër po aq me traditë si Tirana. Një dramë sportive, për të cilin shumica e tifozëve bëjnë përgjegjës Bashkinë e Shkodrës, dhe kjo mendohet se do të ketë ndikimin e vet në zgjedhjet lokale të pranverës së vitit të ardhshëm.
Nga të gjitha ekipet që mjerisht si çdo fund-sezoni bëhen pjesë e pazareve të ulëta, Skënderbeu kishte më pak luksin të toleronte ndeshjen e djeshme deri në kufijtë e qesharakes, për shkak të dënimit nga UEFA, imazhit të dëmtuar, dhe përgjigjes që po pret nga arbitrazhi në CAS.
Megjithatë, ndërhyrjet kanë qenë si duket shumë të forta. Por në Tiranë, Partizani me drejtor sportiv vëllanë e kryeministrit Edi Rama mendoi të hakmerrej, duke e bërë të pavlefshme maskaradën e djeshme që u pa në Korçë. 
Në fund ishin lojtarët e Vllaznisë që shpërthyen në lot. Gjithë të tjerët, përfshi kreun e FSHF-së, Armand Duka buzëqeshën. Ndër objektivat kryesore të Dukës në mandatin e tij të ri, ishte rritja e cilësisë së futbollit në vend, dhe rikthimi i tifozëve në shkallët e stadiumeve. Por me shfaqjen e shëmtuar që u pa të mërkurën vështirë se do të arrihet as e para dhe as e dyta.
TIRANA TODAY
