Ylli është simboli kryesor në flamujt kombëtarë. Ai është i pranishëm në flamujt e 61 nga 198 vendeve të njohura nga Kombet e Bashkuara. Ai shfaqet në flamujt e SHBA-së, Kubës, Kinës, Turqisë, Kilit, Venezuelës, Izraelit, Marokut, Kamerunit, Australisë dhe Bashkimit Evropian. Por ky simbol me 5 cepa, ka domethënie të ndryshme në varësi të flamujve.
Në flamurin amerikan 50 yjet, përfaqësojnë secilin nga shtetet që e përbëjnë atë. Ndërsa në atë kinez, 4 klasat shoqërore dhe ylli më i madh, Partinë Komuniste Kineze. Në vend të dytë për nga simbolet, renditen mburojat mbretërore, që shfaqen në 27 flamuj, si i Spanjës, Kroacisë etj. Pastaj vijnë kryqet, të pranishëm në flamujt e 18 kombeve si Britania, Zvicra, Suedia, Norvegjia, Finlanda, Islanda, Greqia dhe Malta. Vendin e katërt e zë dielli, simbol që shfaqet në 16 flamuj kombëtare, si në atë të Japonisë dhe Argjentinës.
Ndërkohë hëna zbukuron flamujt e 14 vendeve, zakonisht myslimane si Turqia, Algjeria, Libia, Pakistani dhe Tunizi. Po nga ngjyrat? Më e përdorura është ajo e kuqe, që dominon edhe në rastin e flamurit tonë kombëtar. Ngjyra e kuqe, përfaqëson fuqinë ose gjakun e të rënëve në luftë. Pas të kuqes, vjen ngjyra e kaltër, që simbolizon qiellin dhe detin; e bardha, si shenjë e paqes dhe pastërtisë; e gjelbra, imazhin e Tokës por edhe fesë Islame; dhe e verdha, metaforë e diellit ose arit./ Tirana Today
