Ish-zv. Ministri i Brendshëm i Moldavisë, është grushtuar me një anëtar të Partisë së Ndryshimit gjatë një debati televiziv. Kjo skenë ka ndodhur gjatë një emisioni, ndërsa akuzat e ndërsjellta mes palëve duket se janë kthyer në një ‘mollë sherri’. Anëtari i Partisë së Ndryshimit, Sergiu Tofilat është konfliktuar me ish-zv.Ministrin e Brendshëm, Ghenadie Cosovan, pas disa shkëmbimesh akuzash. Situata u agravua më tej kur Cosovan e lagu me ujë Tofilat, i cili iu kthye me grushte e më pas e hodhi në tokë.
E gjithë skena u transmetua LIVE në televizion, teksa mediat moldave shkruajnë se pas emisionit ata i dhanë dorën njëri-tjetrit.
Një ditë më pas, Anëtari i Partisë së Ndryshimit, Sergiu Tofilat ka kërkuar falje publike. Ai ka shfrytëzuar rrjetet sociale, për të përcjellë mesazhin se dhuna është e papranueshme, dhe mosmarrëveshjet nuk zgjidhen me mjete të tilla.
“Më vjen keq për incidentin në televizionin Jurnal. Ishte një situatë në të cilën nuk dija t’i kontrolloja emocionet e mia, dhe pendohem për atë që ndodhi. Dhuna është e papranueshme, mosmarrëveshjet nuk zgjidhen me mjete të tilla. Më vjen keq për këtë incident”.
