Mbrëmjen e djeshme, këngëtarja Jonida Maliqi me “Ktheju tokës” ia doli që të kalojë në finalen e Eurovizionit, duke u kualifikuar pas performancës së shkëlqyer. Por kualifikimi i Shqipërisë është komentuar edhe nga mediat greke.
Në televizionin shtetëror ‘ERT’, prezantuesit Kapoutzidis dhe Kuzaku në momentin që Shqipëria u kualifikua, e komentuan si një nga surprizat e këtij edicioni.
Sipas tyre, kjo arritje ishte falë votimit nga ana e shqiptarëve të diasporës. “Shqipëria edhe pse nuk ishte nga 10 favoritet për t’u kualifikuar, Jonida dhe kolegët e saj arritën të fitojnë zemrat e fansave, dhe u kualifikuan duke bërë surprizën.
Me siguri që në këtë kualifikim do ketë ndikuar shumë numri i madh i shqiptarëve të diasporës, të cilët do ta kenë votuar Jonidën…”, thanë komentuesit grek ‘live’.
‘Ethnos’ shkruan: “Surpriza e natës është me siguri Jonida Maliqi e cila do të përfaqësojë Shqipërinë në finale!”, ndërsa “To Thema” shkruan “Jonida Maliqi u konfirmua si një nga këngëtaret që edhe pse nuk ishte favorite, arriti të kualifikohej. Tani mbetet të shohim se çfarë paraqitje do të ketë në finale!”.
Jonida Maliqi këndoi në shqip këngën përfaqësuese për Shqipërinë para miliona njerëzve. Faqja zyrtare e Eurosong e cilësoi zërin e Jonidës mahnitës, dhe interpretimin e shkëlqyer.
Kënga e përfaqësueses së Shqipërisë, një himn dhe thirrje emigrantëve për të dashur vendet e tyre, u prit me ovacione dhe thirrje të fuqishme, kur u njoftua se Shqipëria u kualifikua. Ajo këndoi live, duke dhuruar emocione anë e mbanë botës.
