Më në fund një lajm i mirë! Një familje turistësh ka bërë një gjest për t’u vlerësuar dhe për t’u marrë shembull.
Rasti i rrallë vjen nga qyteti i Vlorës, ku një familje turistësh shqiptar në Llogara ka gjetur një sasi prej 115.000 eurosh, të cilat i ka dorëzuar në polici.
Konkretisht, çanta është gjetur në zonën ku hidhen parashutat në Llogara, e cila ishte harruar nga shtetas ukrainas.
Familja shqiptare e ka dorëzuar çantën në polici, ndërsa kjo e fundit, pasi ka bërë verifikimet se kujt i përkiste shumë monetare, ka filluar procedim për dy shtetasit ukrainas, për mosdeklarim të ardhurash në Pikën e Kalimit Kufitar!
Në përfundim të hetimeve nga Specialistët e Hetimit të Krimit Ekonomik ka nisur procedim penal ndaj S.M., 62 vjeçe, dhe P.K., 57 vjeç, banues në Ukrainë.
Policia ka sekuestruar në cilësinë e provës materiale shumën e vlerave monetare.
Materialet u referuan në Prokurori për veprën penale “Mosdeklarimi në kufi i të hollave dhe i sendeve me vlerë”, parashikuar nga neni 179/a të Kodit Penal.
Policia falënderon familjen e cila njoftoi dhe dorëzoi pranë Strukturave Policore çantën e gjetur me vlera monetare për aktin qytetar.
