Ministri i Brendshëm, Fatmir Xhafaj, ndodhet në qendër të akuzave. Në një përgjim të bërë publik të hënën, PD pretendon se vëllai i tij, Agron Xhafaj, i dënuar dikur për trafik droge në Itali, e vazhdon ende këtë aktivitet kriminal.
PS ka reaguar, duke vënë në dyshim autenticitetin e përgjimit. Ministri Xhafaj, deklaroi pak ditë më parë se nuk mban përgjegjësi për atë çka ka bërë dikur vëllai i tij.
Fatmir Xhafaj ka zgjedhur heshtjen, ndërsa vëllai i tij paditi për shpifje 3 deputetët demokratë që bënë denoncimin. Sulmi ndaj Fatmir Xhafës, vjen në kulmin e popullaritetit të tij në mesin e ministrave të kabinetit Rama.
Që nga marsi i vitit të shkuar, ai ka shënuar disa arritje në luftën kundër krimit, dhe sidomos trafikut të drogës, dhe ka pasur mbështetjen e ndërkombëtarëve.
Sulmi vjen pak ditë pas paralajmërimit të kryeministrit Edi Rama, se në shtator do të ndërmarrë ndryshime në qeveri. Duket se përtej etjes së opozitës për të dëmtuar më tej mazhorancën, Xhafaj është viktimë e një lufte të ashpër në radhët e mazhorancës.
Ditën që dorëzoi mandatin e deputetit, Saimir Tahiri, sulmoi më ashpër pikërisht pasardhësin për denigrimin sipas tij të padrejtë të punës së tij. A do t’i mbijetojë mazhoranca skandalit të radhës?
TIRANA TODAY
