Megjithëse në mesditë në media u tha se situata në kodrën e Krastës në Elbasan u normalizua orët e mbrëmjes tregojnë krejt të kundërtën.
Video e regjistruar pak minuta më parë tregon që kodra e Krastës vazhdon të digjet dhe zjarri ka marrë përmasa shumë të mëdha.
Aktualisht duket se flakët ka përfshirë një sipërfaqe të gjerë nga sa shihet në pamjet e videos dhe po shkrumbon shkurre dhe pisha.
Me gjithë punën e bërë gjatë ditës, nuk është arritur që të lokalizohen dhe fiken flakët.
Për shuarjen e zjarrit u angazhuan disa zjarrfikëse të Elbasanit dhe qyteteve fqinjë, por terreni i thyer nuk ka lejuar që ata të arrijnë të shuajnë zjarrin.
Parku më i madh, e njëkohësisht mushkëria e Elbasanit, rrezikon të shkretohet. Krasta ndodhet vetëm disa qindra metra larg qytetit të Elbasanit.
Ky pyll me pisha i shërben gjithë qytetit dhe vitet e fundit ishte kthyer në një destinacion turistik për të gjithë banorët e qytetit dhe jo vetëm. Qytetarët e Elbasanit akoma nuk kanë folur për këtë shkatërrim që po u bëhet mjedisit të tyre. Dilema në këtë rast është nëse kundra elbasansve po punon natyra apo klanet mafioze të ndërtimit që i vënë flakën pikave turistike për të betonizuar mushkëritë e qyteteve?
