Prej datës 14 nëntor është hapur Panairi i Librit 2018. Edhe pse ky është edicioni i 21, për të rinjtë ambientet e Panairit, kryesisht shërbejnë si një vend për të kaluar kohën, më shumë se për të blerë libra. Mikrofoni i Tirana Today pyeti disa prej tyre të cilët u shprehën se ndodhen gabimisht te Panairi dhe se nuk kanë aspak për qëllim të blejnë libra. Të pakët janë ata të rinj që kanë vendosur të shpenzojnë për botime.
“Nuk kam blerë për momentin dhe nuk e di nëse do të blejë. Do të shoh deri në fund, para se të iki, nëse bindem për ndonjë botim. Nuk do të harxhoja shumë lekë për të blerë libra.”
“Nuk do të blejë asnjë libër, se nuk kam ardhur për këtë gjë këtu. Na solli shkolla këtu, se të ishte për mua nuk do të vija fare.”
“Kam shpenzuar afro 700 lekë të reja dhe kjo është hera ime e parë te Panairi i Librit këtu në Tiranë. Dhe organizimi më pëlqen, është shumë mirë,”-thotë për Tirana Today një studente nga Kosova.
“Vallaj libri i fundit që kemi lexuar ka qenë abetarja. Ne kemi ardhur për vizitë që nga Kosova dhe nuk kemi asnjë lidhje me Panairin apo me librin.”
Kjo gjë duket se ka shqetësuar dhe vizitorët, të cilët kërkonin të blinin libra, ose të kishin mundësi të flisnin me shkrimtarët e ftuar nëpër stenda.
“Qëlloi që kur erdha unë, ishin dhe një grup nxënësish dhe silleshin sikur e kishin pronën e tyre. Veç për të prishur punë se asgjë nuk lexonin. Rrinin me telefonin në dorë e thjesht pengonin.”
Ndonëse është një edicion i ri, me autorë dhe botime të reja, duket se problemet e Panairit vazhdojnë të jenë të njëjta ndër vite. Veç mungesës së interesit nga ana e të rinjve, vërehet i njëjti organizimin prej vitesh.
“Bukë nuk janë, por avash-avash po shiten dhe librat. Nga një e nga dy. Njerëzit që vijnë këtu kërkojnë të fotografohen, të marrin ndonjë autograf apo thjesht për të bërë pak muhabet. Si organizim kjo është e njëjta gjë prej se e mbaj mend unë. Dhe unë kam që prej vitit 2012 që vij këtu te Panairi. Duhet të dalin nga ato kornizat klasike dhe atyre promovimeve shumë të mërzitshme që të merr gjumi,”-shprehet shkrimtari Albatros Rexhaj.
Ish-zv/ministrja e Arsimit Nora Malaj ngre shqetësimin e mos leximit nga ana e të rinjve. Ku sipas saj kjo gjë mund të zgjidhet duke u krijuar kurrikula dhe metodizma të reja. Me qëllim nxitjen e fëmijëve për të lexuar.
“Kriza e leximit detyrimisht të bën të mendosh që ka nevojë për disa politika të tjera. Fëmijët jo vetëm të vijnë për të bërë shëtitje, e cila është shumë gjë e mirë. Por, përtej kësaj duhet të krijohen kënde të veçanta, ku fëmijëve t’i mësohet fryma e metodizmit se si duhet lexuar. Unë dje harxhova rreth 3000 lekë të reja. Por, nuk besoj se do të harxhoja më shumë se 10 mijë lekë të reja, sepse të tilla janë mundësitë.”
“Vetë pjesëmarrja e gjerë tregon që njerëzve i mungojnë aktivitete kulturore, duhet të ketë më shumë. Dhe është pozitive që ka kaq shumë të rinj, edhe pse sigurisht që ka nga ata të cilët dalin për të parë njëri-tjetrin,”- thotë për Tirana Today, akademiku Ylli Pango.
Ndërkohë deputeti demokrat Flamur Noka thotë për Tirana Today se botuesit nuk kanë marr ndihmën e nevojshme nga Bashkia e kryeqytetit.
“Unë blej kryesisht librat e miqve të mi, sigurisht që blej dhe botime të tjera. Si organizim është i rregullt, por botuesit shprehen se nuk kanë ndihmë nga Bashkia. Dhe pse nuk është çudi që Bashkia nuk ndihmon. Përderisa atje ka një dylber dhe jo një qytetarë të parë të Tiranës, ndaj më vjen keq.” TIRANA TODAY