Akuzat e vjetra dhe të reja rreth vëllait të ministrit të Brendshëm, Fatmir Xhafaj, mbi trafikun e drogës, kanë tronditur sërish qeverinë Rama. Për të mbyllur skandalin nuk mjaftoi as vetë-dorëzimi i Agron Xhafajt tek autoritetet italiane.
Me dëshminë e tij publike, Dëshmitari X, Albert Veliu trazoi më tej ujërat, dhe shtoi tensionin në radhët e mazhorancës një-ngjyrëshe, që mobilizoi të gjithë mediat dhe analistët pranë saj, për të diskretituar dhe zhvlerësuar dëshmitarin dhe bashkë me të kauzën e re të Partisë Demokratike.
Ditët e fundit, nëpër studiot televizive, analistë të “pavarur” kanë sharrë mbarë e prapë njëri-tjetrin me një fjalor vulgar, vetëm për të mbrojtur kauzën e PD-së apo ministrin Xhafaj.
Nervozizmi ka mbërthyer edhe kryeministrin Edi Rama, që sapo u kthyer duarbosh nga Sofia pas takimit me liderët e BE-së, e shtoi dozën e tij tipike të arrogancës ndaj gazetarëve në daljen e tij të djeshme për mediat, duke u destabilizuar mendërisht edhe nga pyetjet më legjitime dhe logjike.
Por përse gjithë kjo adrenalinë negative?
Pse gjithë ky mllef, kur bëhet fjalë për një përgjim të montuar, sikurse pretendohet me prepotencë nga mazhoranca.
A mos vallë e humbëm trenin e integrimit evropian vetëm javën e fundit? A mos vallë deri të hënën në mëngjes kishim shkëlqyer në të gjitha reformat që kërkon Brukseli, dhe mjaftoi vetëm një “shaka pa kripë” e Lulzim Bashës, ajo që na prishi festën? Sigurisht që jo.
Nëse përgjimi Veliu-Xhafaj rezulton i montuar, ajo që do të dëmtohet do jetë në radhë të parë PD, moralisht, dhe ndonjë zyrtar konkret edhe penalisht.
Por nëse është i vërtetë, Edi Rama duhet t’u thotë shqiptarëve, nëse ka ende në radhët e veta ndonjë njeri të papërlyer, që mund të ushtrojë detyrën e ministrit të Brendshëm.
Por pavarësisht se kur sqarohet kjo çështje, apo ajo e Saimir Tahirit, kryeministri duhet të mos humbasë vazhdimisht toruan dhe të përqendrohet tek funksionet e veta kushtetuese të qeverisjes, dhe jo sundimit të këtij vendi.
Në të kundërt, shfaqja vend e pa vend e trazimeve shpirtërore të tij apo mbështetësve në sallonet mediatike, u lë vendin dyshimeve të mëdha.
TIRANA TODAY
