Tensione mes banorëve dhe policisë janë rritur në Himarë. IKMT pritet të shembë sot 22 objekte, sepse preken nga plani urbanistik i qytetit. Deri më tani janë shembur 5 shtëpi. Lidhur me këtë situatë dhjetëra qytetarë kanë dalë në shenjë proteste me flamuj grekë dhe amerikanë në hyrje të qytetit. Ata e kanë cilësuar si grabitje të pronave shembjen e shtëpive në Himarë. Ndërsa për të shmangur incidente të mundshme policia dhe FNSH kanë zbarkuar në vendngjarje. Sipas të dhënave të para, policia ka shoqëruar një person, pasi tentoi që ti vërë zjarrin një autoboti me gaz.
Njoftimi i policisë
Himarë
Lidhur me zbatimin e vendimit për prishjen e disa objekteve në kuadër të Projektit ”Rikualifikimi urban në Spille-Himarë”, i cili është duke u zhvilluar, bëjmë me dije se :
Në mbështetje të organeve ligjzbatuese (IKMT-së) të cilat marrin pjesë në shëmbjen e disa objekteve lidhur me Planin Rregullues në Himarë, për funksionimin dhe garantimin e ruajtjes së rendit dhe qetësisë publike në këtë aksion janë në gatishmëri të plotë rreth 163 forca policore.
Ndër këto forca, 10 janë grupe të FNSH-së si edhe shërbime të tjera Policore prej DVP.Vlorë, prej Komisariatit të Policisë Sarandë, Himarë dhe Delvinë.
Aktualisht bëhet me dije se janë prishur 5 objekte.
Në ambientet Policore është shoqëruar një shtetas për arsye se ka tentuar të shkaktojë zjarrvënie në një autobot me gaz i cili ndodhej në ambientin ku po shëmben objektet.
Policia e DVP.Vlorë së bashku me Grupet e FNSH-së janë në gatishmëri për mbarvajtjen sa më të qetë dhe pa probleme për shmangien e çdo të papriture si edhe parandalimin e ndonjë akti të mundshëm kriminal deri në përfundim të aksionit .
