E cilësuar si sëmundja e pasionit, lojërat e fatit vazhdojnë të jenë një problem për shoqërinë. Edhe pse gjatë komunizmit ishte e ndaluar, në vitet ’80, në mënyrë të fshehtë njerëzit vendosnin baste, ato që ne sot i njohim si skedina. Ndërkohë në vitet ’86, ky problem u ngrit me të madhe nga Komiteti i Partisë, pasi të gjithë shqiptarët luanin baste e skedina. Mbi 32 vjet më pas, duket se asgjë nuk ka ndryshuar.
“Kur s’kam kohë të merrem me gjëra të tjera, vë ndonjë skedinë. Por, nuk është se jam i fiksuar, thjesht e vendos për qejf. Shuma më e madhe që kam hedhur, ka qenë te 10 mijë lekë dhe shuma më e madhe që kam fituar ka qenë 200 mijë lekë,”-thotë për Tirana Today një qytetar.
“Luajmë nga gjëra të vogla përditë, 4-5 mijë lekë. Ka njerëz që luajnë nga 10 apo 20 mijë euro. Problemi qëndron tek lojërat e fatit, ato janë jashtëzakonisht të rrezikshme. Atje lufton me korrentin, kurse këtu lufton me mendjen tënde dhe qëllon që ndonjëherë edhe fati të ndihmon.”
Por, ndryshe mendojnë një tjetër pjesë e qytetarëve, të cilët shprehen për Tirana Today se ata persona që luajnë me skedina, nuk janë familjarë. Ndërkohë, të tjerë luten që të mos kenë fatin, ku fëmija i tyre të merret me skedina.
“Ishalla nuk e kam atë fat. Kjo është një ndër më të këqijat, është e njëjtë si vesi për drogën, me gjithçka,”-thotë një qytetare. Tirana Today
