Ish-drejtuesi i Prokurorisë së Tiranës, Petrit Fusha, ka dhënë dorëheqjen nga detyra pas një karriere 32-vjeçare në sistemin e drejtësisë. Ai mund të konsiderohet pa frikë si njeriu më i pasur i drejtësisë. Prokurori i Prokurorisë së Përgjithshme, Petrit Fusha, i cili dha dorëheqjen ditën e sotme, ka qenë një nga prokurorët më të atakuar në opininon publik.
Kjo për shkak të dosjes më delikate që ai kishte në dorë, vrasja e 15-vjeçarit Ardit Gjoklaj në landfillin e Sharrës. Ai dyshohet se mbylli dosjen e 15 vjeçarit Gjoklaj, ndërkohë që edhe Partia Demokratike ka hedhur akuza të tjera kundrejt Fushës, për mbyllje të shumë dosjeve të tjera qeveritare të ministrave më të korruptuar. Ai dha dorëheqjen pa iu nënshtruar procesit të Vettingut, duke e argumentuar se dorëheqja erdhi për arsye personale.
Pasuria
Duke i refruar deklaratave të pasurisë në ‘Open Spending Albania’, rezulton se pasuria e prokurorit Fusha shkon tek rreth 1 milion dollarë. Nëse do të hetohet pasuria e tij, atëherë Petrit Fusha mund t’i thotë lamtumirë Prokurorisë.
Karriera
Fusha për pesë vite radhazi ka drejtuar Prokurorinë e Tiranës, katër vite si drejtues i Prokurorisë së Tiranës, dhe një vit si zëvendësdrejtues. U desh emërimi i Prokurores së Përgjithshme të përkohshme Arta Marku, për të larguar nga drejtimi i institucionit Fushën. Ashtu si kolegët e tij, edhe Petrit Fusha pritet të kalojë në sitën e Vettingut, si në aspektin pasuror dhe atë profesional.
Fusha, “peshku i madh”
Sa i takon anës profesionale, mbi supet e tij rëndon rasti i Ardit Gjoklajt, ndërsa në anën pasurore, Fusha mund të rreshtohet në krahun e “peshqve të mëdhenj’.
Letra e dorëheqjes së Petrit Fushës
Pas 32 viteve pune në shërbimin e Prokurorisë, çmoj se përvojën që kam mund ta përdor në dobi të një aktiviteti tjetër me më pak ngarkesë.
Koha në të cilën po jetojmë është tej ngarkuar me ngjarje e fenomene të drejta e të pa drejta. Një profesionist në moshën time, natyrshëm zgjedh me maturi vendin se ku mund të kontribuojë më mirë.
Ndaj gjykova se Prokuroria nuk është më vendi ku unë mund të shërbej me përvojën 32 vjeçare. Një përvojë e akumuluar tashmë nga procese hetimore e gjykimi të çdo lloj çështje e niveli.
Në këto kushte ju paraqes sot dorëheqjen time nga detyra e Prokurorit në Prokurorinë e Përgjithshme, si dhe nga shërbimi i Prokurorisë.
