E themeluar në 1972, Akademia e Shkencave është institucioni më i madh shkencor në vend. Por, në shtator të vitit të kaluar, kryeministri Edi Rama kërcënoi për ndërprerjen e fondeve të qeverisë për këtë institucion.
“Akademia po mbetet si një vend ku organizohen funeralet. Është bërë si shtëpi varrimi, hap derën për të nxjerrë arkivolet jashtë.”
Kështu është shprehur kryeministri gjatë një mbledhje me akademikët disa muaj më parë.
Por, edhe sot, duket se ngërçet nuk janë zgjidhur plotësisht. Edhe pse është ngritur grupi i reformimit, Akademia vazhdon të jetë pa kryetar. Kreu i grupit të punës që po harton projektligjin për reformimin e Akademisë së Shkencave, Skënder Gjinushi thotë në një intervistë për Tirana Today se Akademia vazhdon të jetë pa institute, por ligji është i hapur.
“Akademia është në një periudhë funksionimi të pjesshëm, sepse kryetari dhe nënkryetari kanë dhënë dorëheqjen. Por, tashmë ka një bashkëpunim konkret midis qeverisë dhe akademisë.
Akademia ngre rast pas rasti njësit e kërkimit dhe studimit. Pra, ligji i ri absolutisht e jep mundësinë. Që nga 2008, ku institutet kanë kaluar pranë shkollave të larta, ndërsa Akademisë nuk i është lënë ndonjë institut në vartësi. Por, ligji e lë të hapur sepse nuk ka zgjidhje unike. Njësitë e përkohshme ngre vetë Akademia me vendim të sajin. Ndërsa, institutet ngrihen në bashkëpunim dhe me vendim të Këshillit të Ministrave, sepse kanë nevojë për buxhet. Ndërkohë, buxheti nga qeveria vazhdon ai që është miratuar, pa ndonjë përplasje apo problem.”
Gjinushi paralajmëron “vetting” edhe në radhët e akademikëve. Kjo pasi, sipas tij janë shumë anëtar të cilët kanë abuzuar me titujt, veçanërisht me doktoraturat.
“Tituj të caktuar, duke filluar nga doktorët deri në profesorë dhe akademikë; ka shumë raste që janë pa meritë. Ndaj, patjetër që duhet ushtruar edhe një mjet pastrimi apo kontrolli mbi to. Shtrembërimet më të mëdha, bëhen në doktoratura. Dhe për hir të njërit apo tjetrit, zhvlerësojmë gjithë doktoraturat apo gjithë profesoratin.” TIRANA TODAY
