Gjykata e Rrethit Gjyqësor Tiranë, ka marrë vendimin javën e kaluar për ta miratuar regjistrimin e Qendrës “Lëvizja Vetëvendosje në Shqipëri” me statusin e organizatës jo-fitimprurëse.
Në njoftimin e Vetëvendosjes thuhet se përmes këtij themelimi do të angazhohen për aspiratën shekullore të shqiptarëve për bashkim kombëtar.
“Ne e vlerësojmë këtë vendim të marrë bazuar mbi ligjet dhe shtetin e së drejtës. Ky akt është vazhdimësi e aktivitetit tonë disa vjeçar në Republikën e Shqipërisë, por tashmë në një formë të re. Në qëllim dhe motiv, në parim dhe veprim, përmes këtij themelimi ne do të angazhohemi për aspiratën shekullore të shqiptarëve për bashkim kombëtar, ashtu siç shprehet edhe në Preambulën e Kushtetutës së Republikës së Shqipërisë, bashkë me përpjekjen për një shtet zhvillimor që lufton pabarazitë e mëdha ekonomike qe janë krijuar. Frymëzimi ynë rrjedh edhe nga përfytyrimi i të ardhmes për vendin tonë, si vend që ia mundëson grupeve e shtresave të ndryshme shoqërore dhe individëve shpërthimin e potencialeve të tyre, duke zhvilluar e mbrojtur ekonominë e përbashkët dhe atë individuale me drejtësi, demokraci, transparencë dhe përgjegjësi në vendimmarrje”, thuhet në njoftimin e Vetëvendosjes.
Më tej, theksohet se Qendra e Lëvizjes Vetëvendosje do të organizojë inaugurimin në Tiranë për të shënuar fillimin e këtij organizmi të ri.
