Mbrëmjen e djeshme, një ngjarje e rëndë u shënua në kryeqytet, ku nënë e bijë u vetë-flijuan në banesë. Ndërsa vajza tjetër, ka dalë nga rreziku për jetën. Anisa Josifi, vajza e cila u gjet e pajetë, dyshohet se kishte ndërruar jetë prej disa kohësh, por mbahej në banesë duke u lyer me vaj dhe uthull, në mënyrë që të mos ndihej era e trupit të dekompozuar.
E ndërsa vajza që ndodhet në spital, Blerta Josifi, ka deklaruar para hetuesve: “Se keni idenë çfarë kaluam ne për të fituar ringjalljen”.
Ky rast fillimisht u raportua nga vëllai i Zhanetës, pasi motra e tij dhe dy mbesat nuk i përgjigjeshin në telefon dhe nuk i hapnin as derën.
Një banore e pallatit ku banonte Zhaneta Josifi, bashkë më dy vajzat e saj, ka treguar për Report Tv se vajzat nuk pranonin asnjë në shtëpi. “Ishin vajza të shkëlqyera, ishin me shkollë të lartë. Mbase kanë pasur nevojë për psikologë. Siç thoshin komshinjtë, vajzat nuk pranonin asnjë person brenda. Thoshin që ishin predikuese, por nuk e di sepse vajzat nuk i kisha parë. Vetëm nëna e tyre dilte. Unë kam 5 vjet këtu, vajzat nuk dilnin fare nga shtëpia”, tha banorja e pallatit.
