17-vjeçarja Enisa Doda humbi jetën në det në rrethana ende të pasqaruara, për shkak se personi me të cilin e nisi xhiron me motor, Indrit Bajraktari, ka gënjyer disa herë. 25-vjeçari rezulton i martuar në Angli, ndërsa kishte shumë pak kohë që ishte kthyer në Shqipëri.
Xhiroja fatale që përfundoi me vdekjen e 17-vjeçares ende nuk është zbardhur, ndërsa dëshmia e të riut para policëve ka qenë kontradiktore. Policia këmbëngul në versionin se Bajraktari doli nga deti pa Dodën dhe pa motorin e ujit. Trupi i vajzës u gjet i pajetë në det, rreth 800 metra larg bregut. Në qafë i varej çelësi i motorit, ndërsa sipas policisë, në trupin e të miturës kishte shenja dhune.
Nga ana tjetër, Indrit Bajraktari u ka thënë pronarëve të motorit se vajzën e kishte shoqëruar tek xhaxhai i saj bashkë me motorin. Ky i fundit ndryshoi versionin e tij në polici. Ai tha se kishte qenë bashkë me Enisa Dodën në motor, kur ajo u rrëzua dhe u mbyt.
Misterin e ngjarjes nuk e shton vetëm dëshmia e rreme e Bajraktarit, por edhe shenjat në trupin e vajzës. Në morinë e të dhënave kontradiktore, shtohet edhe ajo e familjarëve të së ndjerës.
Të afërmit e Enisa Dodës kanë ngritur dyshime se në motorin e ujit kishte edhe vajza të tjera. Ata thanë se e mitura nuk dinte mirë not, dhe se nuk kishte jelek uji.
Po kështu, familjarët nuk kanë sqaruar rrethanat e njohjes së vajzës së tyre të mitur me 25-vjeçarin, apo për mënyrën sesi ajo iu ka kërkuar që të dalë me të dhe shoqet e saj.
