Portugalia ka arritur të marrë një fitore mjaft të vuajtur përballë Marokut të Mehdi Benatia. Marokenët ishin mjaft të karikuar në këtë sfidë pasi ishin mposhtur edhe në ndeshjen e parë nga Irani dhe do të jepnin gjithçka. Ishte pikërisht ylli portugez, Cristiano Ronaldo që prishi planet e tyre që në minutën e 4’ të sfidës, pasi shënoi golin e tij të katërt në këtë Botëror. Duke mos pasur asgjë për të humbur, Maroku hidhet në sulm duke ua bërë ndeshjen mjaft të vështirë portugezëve.
Me këtë gol, ylli i Real Madrid është bërë golashënuesi më i mirë në rang ndërkombëtar në kontinentin europian. Marokenët ishin të përgjumur gjatë një goditjeje këndi që në minutën e 4’, dhe Ronaldo nuk të fal në raste të tilla duke goditur topin me kokë drejt rrjetës. Por pas golit ishte vetëm një ekip që kërkonte të shënonte, dhe ai ishte Maroku.
Skuadra afrikane ka tentuar në të gjitha mënyrat të gjente golin e barazimit por në disa raste janë treguar të pasaktë dhe në disa raste portieri Rui Patricio ka bërë mrekullinë. Portugalia shkon në kuotën e katër pikëve duke bërë një hap shumë të rëndësishëm drejt fazës së nokautit, ndërsa Maroku duhet t’i thotë lamtumirë Kupës së Botës.
