Franca ka mposhtur Perunë me rezultat minimal 1-0 dhe ka siguruar kualifikimin për në fazën tjetër. Ishte Kylian Mbappe heroi i kësaj ndeshje, duke shkruar edhe historinë si adoleshenti i parë në historinë e Francës që shënon në një Kupë Bote. Deschamp kishte bërë ndryshime në formacion për ndeshjen e dytë, duke futur në fushë Giroud që nga minuta e parë dhe duke sakrifikuar Dembele.
Duket se Franca me Giroud në sulm funksionon më mirë, pasi sulmuesi i Chelsea krijon shumë hapësira për shokët e skuadrës. Ishte pikërisht ai që krijoi edhe golin e avantazhit, ku pasi goditi topi devijohet dhe Mbappe del me portën e boshatisur dhe e dërgon topin në rrjetë.
Por në pjesën e dytë Franca mund të kishte mbyllur ndeshjen, diçka që nuk e bëri, duke lënë të hapur rezultatin deri në sekondën e fundit. Edhe Peruja u mundua të bënte diçka, dhe me pak fat mund të kishte barazuar. Por ndeshja mbyllet me fitoren e Francës që tani luan vetëm për të siguruar vendin e parë të grupit. Ndërkohë Peruja i thotë lamtumirë Kupës së Botës pas dy disfatave radhazi.
