Kryeministri Edi Rama dhe ai i Kosovës, Ramush Haradinaj kanë dalë në një konferencë për shtyp, pas takimit të tyre.
Gjatë kësaj konference, kryeministri Rama bëri me dija tre pika të rëndësishme të vendosura mes dy qeverive.
Ai njoftoi se mes dy shteteve është rënë dakord që të hiqen kontrollet në kufi dhe t’u mundësohet lëvizje e lirë shqiptarëve. Rama shtoi se kontrollet nuk do të zhduken, por theksoi se do të jenë shumë të rralla.
Një pikë tjetër e rëndësishme e dakordësuar mes dy kryeministrave, ishte bashkimi doganor në portin e Durrësit, pasi kryeministri shqiptar tha se është e padrejtë që ndërmarrjet që çojnë mall në Kosovë të kontrollohen dy herë.
Një tjetër pikë e rëndësishme që kryeministri Rama njoftoi, është shkrirja e selive konsullore, për të shmangur shpenzimet e tepërta.
Ndër të tjera, Rama tha se Shqipëria ka qenë mjaft e angazhuar, por do të bëjë më të mirën të mundshme për njohjen e Kosovës.
KONFERENCA, fjala e Ramës:
Sot kemi rënë dakord për ta vendosur fokusin në fushat ku ka nisur një proces, por ku progresi ka qenë larg të qenit i mjaftueshëm. Së pari për shtetasit që punojnë, jetojnë në dy anët e kufirit. Çka nënkupton më të thjeshtën: lëvizjen e lirë në kufi, ku qytetarët e Shqipërisë dhe të Kosovës ndeshen me një mur absurd dhe këtë mur ne duam bashkarisht ta shembim për të filluar vitin e ardhshëm me një kufi simetrik në ngjashmëri me kufijtë e vendeve evropianë, një kufi evropian për Shqipërinë dhe Kosovën. Nuk do hiqen për fare kontrolle, por do të jenë shumë të rralla.
Po ashtu ekuivalentimin e diplomave dhe aksesimin në tregun e punës.
Kemi një dakordësi të plotë që unifikimi i tregut tonë duhet t’i paraprijë si model unifikimit të tregut rajonal. Dua të nënvizoj se Shqipëria dhe Kosova i kanë të gjithë mundësitë të jenë modeli që i paraprin me shembullin e vet krijimit të zonës ekonomike rajonale.
Sot kemi dakordësuar që ta mbyllim një proces të mirëstudiar të bashkimit doganor në portin e Durrësit, i cili nuk është vetëm i Shqipërisë zyrtare, por edhe i shqiptarëve të Kosovës.
Është e padrejtë që sipërmarrjet shqiptare që çojnë mall në Kosovë përmes portit të Durrësit të kontrollohen dy herë dhe të përballen me dy palë procedura, këtë kemi rënë dakord ta finalizojmë në mbledhjen e 27 nëntorit.
Së treti Shqipëria dhe Kosova duhet të përfitojnë nga mundësitë e ofruara, përmes procesit të Berlinit ne të mund të jemi shembullorë nga përfitimet nga procesi si dy shtete të interesuara për të funksionuar se bashku.
Kemi rënë dakord që t’i japim fund shpenzimeve të kota për seli konsullore veç e veç, kemi folur për një plan të përbashkët ndërtimit të një fondi imobilar që do jetë njëkohësisht i dy shteteve.
Diplomacia jonë do jetë edhe më aktive për njohjen e Kosovës dhe Shqipëria do e mbështesë me të gjithë fuqinë e vet dialogun mes Prishtinës dhe Beogradit, duke qenë qartësisht në anën e Kosovës në funksion të zgjidhjes realiste.
E shikojmë më shqetësim çështjen e demarkacionit me Malin e Zi, ku është e domosdoshme të gjendet zgjidhja e këtij ngërçi./Tirana Today
