Ministri i Shëndetësisë në Brazil, Nelson Teich ka dhënë dorëheqjen pa bërë ende një muaj, që nga marrja e postit.
BBC raporton se ministri ka pasur mosmarrëveshje në lidhje me menaxhimin e situatës së koronavirusit nga qeveria.
Teich kishte kritikuar një dekret të lëshuar nga presidenti, Jair Bolsonaro, që lejonte rihapjen e palestrave dhe salloneve të bukurisë.
E njëjta situatë është paraqitur edhe me paraardhësin e tij, i cili u shkarkua pasi nuk ra dakord me kreun e shtetit.
Presidenti i Brazilit vijon të shprehet kundra masave kufizuese, duke e cilësuar koronavirusin si “thjesht grip” dhe se përhapja e tij është e pashmangshme.
Brazili është për momentin vendi i gjashtë me numrin më të lartë të rasteve me koronavirus në botë, pas SHBA-ve, Spanjës, Rusisë, Mbretërisë së Bashkuar dhe Italisë.
Në 24 orët e fundit, Brazili ka regjistruar 138 viktima duke e çuar në 14,131 numrin total të personave që kanë humbur jetën nga COVID-19.
Deri më tani, Brazili regjistron mbi 206 mijë raste infektimi.
